Tirkîya de aşma Çeleyî de 18 rojnamegerî ameyî tepiştiş û înan ra news tenî ameyî tewqîfkerdiş. Goreyê Raporê Binpaykerdeşê Heqan yê Komela Rojnamegeran a Dîcle-Firatî (DFG), derheqê 42 rojnamegeran de tehqîqat ame destpêkerdene.
Girewtişê rojnamegeran zêde bi
Polîsan 17ê Çeleyî de eşt şîrketanê produksîyonî yê Guncel û Martî ser û çarçewaya eynî tehqîqatî de bajaranê Wan, Mersîn û Îstanbulî de zî operasyon kerd. Netîceyê operasyonî de rojnamegerî Reyhan Hacioglu, Rahîme Kavrar, Velat Ekîn, Necla Demîr Arvas, Vedat Oruç, Ahmet Guneş û Eylem Babayîgît ameyî girewtiş.
102 rojnamegerî muhakeme bîyî
43 dosyayan de 102 rojnamegerî seba xebatanê xo yê meslegî muhakeme bîyê. Netîceya nê muhakemekerdişan de 12 rojnamegeran rê 31 serrî û 2 aşmî cezayê hepisî ame dayene. Mudira Xeberan a verêne ya Jinnewsî Sofya Alagaş seba dozanê eleqedarê demê rojnamegerîye 6 serrî û 3 aşmî ceza girewt.
Qanuno newe yo sansurî ame pêşkêşkerdene
Parlamenterê AKPyî Atay Uslu û Alî Ozkaya û 133 parlamenterî 10ê Çeleyî de teklîfê Qanunê Emnîyetî yo Sîber o newe pêşkêşê Meclîsî kerd. Teklîf 15ê Çeleyî de Komîsyonê Pawitişî yê Meclîsî de ame qebulkerdene. Qanun kesanê ke xebera "parekerdeşê datayan" virazenê rê 2 serran ra heta 5 serran cezayê hepisî dano.
Hesabê medyaya dîjîtalî ameyî girewtene
Aşma Çeleyî de hesabê Ajansa Mezopotamya (@MAturkce), hesabê JINNEWSî (@jinnewsturkce) û hesabê rojnameya Yenî Yaşamî (@yeniyasamgazete) tede 31 hesabê medyaya dîjîtalî ameyî astengkerdiş.
Çimeyî:
- Komela Rojnamegeran a Dîcle-Firatî
- Raporê Binpaykerdeşê Heqan yê Aşma Çeleyî
