Dêrsim de xeylê rêxistinê cinîyan û sazîyanê sîvîlan vera şîdetê camêrdan ameyî têhet.
Dêrsim de cinîyî vera şîdetê camêrdan vejîyayî meydanan û mesajê xurtkerdişê têkoşînî dayî.
Platformê Cinîyan ê Dêrsimî çarçeweya 25ê Teşrîna Peyêne Roja Têkoşînê Vera Şîdetê Serê Cinîyan de bi şîarê, Vera feqîrîye , şîdet û şerî têkoşîno rêxistinkerde Kuçeyê Hunerî ra ver bi Meydanê Seyîd Rizayî rayşîyayîş kerd.
Cinîyan Meydanê Seyîd Rizayî de beyanatêk da. Beyanat hetê Endama Platformê Cinîyan ê Dêrsimî Fatoşe Taşkale ra ame wendiş. Fatoşe Taşkale bale ante hêrişanê vera cinîyan ser va: '' 10 aşmanê verênan ê 2023yî de 353 cinîyî ameyî qetilkerdiş. Cinîyî her roje bi hewayêkê sîstematîkî raştê tacîz, îstîsmar û her qeyde şîdetî yenê. Netîceya polîtîkayanê leyminan de Gulîstane Doku 5ê çeleyê 2020 de ameye qetilkerdene ke hema zî qetilkarî nêameyî cezkakerdene. Ma tîya ra reyna veng danê ke wa qetilkarî bêrê cezakerdene.''
Badê qiseykerdişan Songule Bulur eserê xo yo ke semedê cinîyan nuşte vat. Dima ra Grûba Erbane ya Meclîsê Cinîyan ê SESî erbaneyî kuwayî û deyîrî vatî.
