Şaredarîya Amedî ya Bajarê Girdî, Merkezê Kultur û Kongreyî de dîwanê dengbêjan a bêpere viraşt.
Xebatê bêpereyî yê aşma êlule ke hetê Serekîya Daîreya Karê Kultur û Sosyalî ra ameyê organîzekerdene, bi dîwanê dengbêjan dewam kerdî.
Dîwano ke Merkezê Kultur û Kongreyî yê Çand Amedî de virazîya, dengbêjê ke Keyeyê Dengbêjan yê Serekîya Daîreya Karê Kultur û Sosyalî de xebatanê xo kenê, Hesenê Şilbê, Alîcanê Pasurî û Îbrahîmê Pîrîkê beşdar bîy.
Dengbêjî ke kiriştoxê kulturê fekan yê Kurdan ê, bi deyîr û kilamê ke wendî, keyf da temaşekaran.
Dengbêjan xebate de, tena deyîrê mintiqaya Amedî nê, yew kilame zî seba vîrardişê dengbêj Seyîtxanê Boyaxçîyo ke mîyanê şarî de sey Bilbilê Amedî yeno zanayene û temmuza 2020î de cuya xo vînî kerda, wende.