Enwer Yılmaz
Pêroyê Tirkîya de doktorê ke ocaxanê weşîye de wazîfe kenê, semedo ke rewşa xebata înan bêra raştkeridiş kar caverda.
Bi taybetî Diyarbekir û zaf bajaran de, na çalakî do mabênê 2-6 kanûne de pênc rojî dewam biko. Nê qerarê doktoran mîyanê şarî de bîyo sebebê kembîyayîşê girewtişê xizmetanê weşîye.
Doktorê ocaxanê weşîye, verî zî mabênê 5-7 teşrîna Peyêne de hîrê rojî fek karî ra veradabî û şîbî greve. Na kerdena doktoran tayinan ra paştî girewt la tayinan ra nêgirewt û rexneyî ameybî kerdiş. Xususî, şaro ke xora nêeşkeno xizmetê weşîye bigîro nê qerarê doktoran ra aciz o.
Doktorî vanê, ma wazenê bi no qayde heqanê xo bipawê. Bi taybetî wazenê vera sînorkerdişê reçetekerdiş ê sey dermanê dejî, antibîyotîk û dermananê bînan vengê xo vejê. Bi no qayde nêwazenê mnêweşan dir muxatab bibê. Doktorî îfade kenê ke, rewşa înan a xebate baş nîya, meaşê înan kêm o û bi na çalakî wazenê wa rewşa înan a xebate bêra raştkerdiş û meaşê înan bêro zêdekerdiş.
Doktorî, na çalakîya xo sey protestoyêk ney, sey gama semedê raştkerdişê xizmetê weşîye name kenê.
Labelê na çalakî mîyanê şarî de weş nêameya vînayîş. Tay kesî paştî danê na kerdena doktoran û wazenê wa waştişê înan bêrê ca. Labelê tay kesî zî endîşe kenê ke, rîyê nê qerarê doktoran ra nêweşî zirar bivînê. Bi taybetî nêweşê ke lazimtîya înan bi raporan esta do mexdur bibê. Kesê kalûpîr û yê ke lazimtîya înan bi girewtişê gûnî esta, semede înan na kerdena doktoran problemêko cidî yo.
Çalakiya vindarnayîşê karê doktoran, problemê sîstemê weşîye hewna vet werte, û netîceyê na çalakî meraq bena ke ka çareserîyêk semedê doktoran yena vînayîş yan ney.
Labelê çalakîya ke nêweşî tira zirar vînenê mi rê zaf raşt nêna. Tabî problemê doktoran estê û gere bêrê safîkerdiş zî.