Nuştox û Cigêrayox Roşan Lezgînî ferhengê zazakî yo ke tede 30 hezar çekuyî estê, Dîyarbekir û Çewlîg de wendoxanê ke dersê kurdkî weçînayê, înan rê bêpere vila kerd. Xebata vilakerdişê kitaban hetê Avukat û nuştoz Sidki Zîlanî ra amey ramitiş.
Nuştox û Cigêrayox Roşan Lezgînî, bi xebata ke serranê dergan ramite, ferhengêko ke tede 30 hezar çekuyî estê û 504 rîpelî yo, bi nameyê Zazakî-Tirkî & Tirkî-Zazakî temam kerd. Ferhengo ke Weşanxaneyê Roşnayî ra vejîya, wendoxanê ke dersê weçînayî ya kurdkî (zazakî-kurmanckî) weçînayê, înan rê bêpere vila beno.
Lezgînî, programêkê televîzyonî de ke tede beşdar bi va ke, ferheng verê cû 2 hezar hebî amebi çapkerdene la no çap qedîyabi û çapêko newe ameyo amadekerdene. Lezgînî va ke çapê neweyî 1 hezar heban ameyo çapkerdene û no çap zî bi leze qedîyeno.
Lezgînî va ke, ferhengo newe bi muhtewayêko hîrayêr ameyo amadekerdene û nê melumatî pare kerdî: "Ma ferheng kerd hîra ke wendoxî û cigêrayoxî bieşkê torbeyê xo de rehet bigêrê xo het. Çapê verênî de 16 hezar çekuyê kurmanckî-zazakî estbî, çapê dîyinî de ma no amar kerd 20 hezarî. Çapê neweyî de; 12 hezar û 500 çekuyê zazakî-kurmanckî, 13 hezar û 600 çekuyê zazakî-tirkî û 12 hezar û 400 çekuyê tirkî-zazakî ca gênê. Pêro pîya ma 3 hezar çekuyê zêdeyî dekerdî."
Çapê neweyî ra qismêk bêpere ame vilakerdene. Seba mintiqa pîlotî Qeza Hanî ya Dîyarbekir ame weçînayene, uca de 400 û Qeza Solxanî ya Çewlîgî de zî 300 ferhengî ameyî vilakerdene. Xebate Hanî de Avukat Sidqî Zîlanî ramite.
Goreyo ke ame zanayîş, Zîlanî Gêl de 30, Pîran de 55 hebî zî gedeyanê ke ki Zazakî tercih kerdo rê ameyê vilakerdiş.
Zîlanî va; “Mamosteyê ke ders donê, mudiranê perwerdeyî û protokol îmza kerdî û badê kitabî ameyî vilakerdiş. Ma teberê ferhengî setê DILŞA yê Nubiharî ameyî vilakerdiş.
