Mihemmed Kurdî*
Nê rocan de pêrodayişê/şerê mîyanê Filîstîn û Îsraîlî rojeva zaf welatanê cihanî de yo. Zaf welatî seba berjewendêyanê xwu nê şerî gam bi gam şopînenê.
Derheqê şerî de her welat xwu gore vindertişê xwu kifş keno. Tay welatî sey Emerîka paştî danê Îsraîlî û Hamasî şermezar kenê. Tay welatî sey Tirkîya zî paştîya Filîstînîyan kenê û galeyanê Îsraîlî zî bi wişkî şermezar kenê.
Rayedarî tirk her tim semedê kiştişê sîwîlan Îsraîlî sûçdar kenê û vanê ke "Îsraîl galeyê şarê bêguna keno û înan kişeno." Tirkiya semedê paşdayişê şarê Filîstînî protestoyan /mîtîngan virazena û şarê ke nê mîtîngan de ca gênê zî sondê heyfgirewtişî wanenê. Serekkomarî nê welatî zî vat ke "Îsraîl yew dewletêko terorîst o, her roc tutan, cînîyan û kokiman kişenê." Ancî serekkomarî vat ke "Semedê galeyê Îsraîlî zaf cayan de awe û ceyran çin o, çirê vera nê galeyanê Îsraîlî sewt dinyayî ra nêvejîyeno? Nêweşxane û cayê ciwîyayişî benê armancê galeyanê Îsraîlî la çi heyfo ke zaf hetî û welatî çimê xwu nê galeyan rê gênê." Tewr peyên zî vat "Heta ke Filîstîn nêbo yew dewletêko xoser do nê galeyanê xo rê dewam bikero."
Vateyêkê ma yê verênan est o, vano ke :" Darê çimê xwu de nêvîneno la qirşikê çimê şarî de vîneno."
Meseleya Tirkiya zî wina ya. Gama ke rayedarê tirkan Îsraîlî şermezar kerdêne eynî wextî de teyareyê înan Rojava de îstasyonê elektirîkî, santiralê awe, nêweşhane, çapxane, wendegeh, kargeh, rayîr, war û wargeyan bomba kerdêne. Peynîya nê galeyan de bi hezaran tut/doman, cînî, leşker, wendox, xebatkar û merdimê bêguna ameyê kiştiş. Ancî nê galeyan de xisarê bi seyan milyon dolar dîya Rojavayê Kurdistanî.
*Gelo Meqseda nê galeyan çi yo?
Meqseda Tirkiya bi nê galeyan no yo ke Rojavayê Kurdistanî Kurdan ra veng bikero, seba ke ney zî bîyaro ca galeyê cayê ciwîyayişî yê şarî û galeyê war û wargeyan kenê. Tirkiya wazena bi no qayde çimê şarî bitersno û şar bêderfet verado û dima zî şarî bêçareyî/mecbûrî ra koç bikero. Badê koçkerdişî zî ena ray herinda Kurdan de sewbîna şaran bi ca bikero. Yanê Tirkîya wazena ke sey Efrîn û Serêkanî û Girê Spî demografîya şaristananê Kurdanê bînan zî bivurno/bibedilno. Tirkîya nê pilananê xwu zî binîzam kena.
Yanê tirkîya hetêk ra galeyê Rojavayê Kurdistanî kena, heto bîn ra zî bi zanayîş bala dinya ancena meselaya Filîstînî ser o û bi no qayde zî heme cirm û sucanê xwu nimitnena.
Raşta ci Tirkîya naye sîyasetê xwu de zî serkewta ya.
Vera nê galeyanê Tirkîyeyî de çi heyfo ke dinya ra yew veng/sewt nêvejîyeno, yew welat zî bi vengê/sewtê cînî û tutanê kurdan nêhesneno. Raşta ci halê Rojavayê Kurdistanî yê Gilîstînî ra cîya nîyo, heta ma eşkenê bivajê ke halê Rojavayî yê filîstînî ra xirabêr o. Semedo ke Rojavayê Kurdistanî ser o bi serrano ke ambargo est o coka derfetê ciwîyayişê şarê Rojavayî zî zaf kemî yo. Her çiqas ke zaf hetî û dewletî zanenê ke şarê ma yê Rojavayî bêderfet û bêpawitiş o labelê ancî zî vera nê galeyan de yew vengê/sewtê xwu nêkeno û çimê xwu nê zilmî ra gêno. Beno ke bêvengbîyayîşê dinya bêdewletbîyayîşê ma ra yeno, yanê eke dewleta ma zî bibîyêne beno ke dewletê dinya seba ma zî vengê xwu berz bikerdêne.
Raşta ci heta ke ma kurdî yewitîya xwu awan nêkerê halê şarê ma do hertim wina bo, Naray eke hetê Kurdanê sîyasî wazenê şarê xwu binê nê zilmî ra bixelasnê ganî seba yewitîya neteweyî cehd bikerê. Xwu vîra mêkerê tena yewitîya ma eşkena vernîya nê qirkerdişan û kiştişan bîgîra.
11.01.2024 / Mêrdîn
E-meîl: mihemedkurd47@gmail.com