Heyeta Îmralî ya DEM Partî seba ke Serekê PKKyî Abdullah Ocalanî dir pêvînayîş bikero şî girava imralî.
Heyeta Îmralî ya Partîya Demokrasîya ya Şaran (DEM Partî) semedê pêvînayîşê hîrêyînî şîy Îmralî
Mîyanê heyete de Ahmet Turk, Pervîn Buldan, Sirrî Sureyya Onder, Tulay Hatîmogullarî, Tuncer Bakirhan, Cengîz Çîçek û Faîk Ozgur Erol ca gênê.
Heyete do pêvînayîşî ra dima Îstanbul de beyanat bido çapemenî û vengdayîşê Abdullah Ocalanî pare bikero.
Çi bîbî?
Serekê PKKyî Abdullah Ocalanî 23ê Teşrîna Verêne ya 2024î de çarçewaya pêvînayîşê keyeyê xo de 43 aşman ra dima tewr verî bi birarzayê xo Parlamenterê DEM Partî yê Rihayî Omer Ocalan dir pêvînayîş kerd. Ocalanî pêvînayîşê xo de vatbî, "Eger şert û mercî bêrê ca, hêzê mi ya teorîk û pratîk esto ke ma na mesela rê hetê huqûqî û sîyasî ra çareyêk peyda bike."
Pêvînayîşî ra dima Buroya Huqûqî ya Asrinî îlan kerd ke 6ê Teşrîna Peyêne ya 2024î de 6 aşmî cezaya newe ya qedexekerdişê pêvînayîşî dîyaya Ocalanî.
Serekê Pêroyî yê MHPyî Devlet Bahçelî zî kombîyayîşê koma partîya xo yê 26ê Teşrîna Peyêne de va, "Ma pawenê ke mabênê Îmralî û koma DEMî de ri bi ri pêvînayîşî bêrê kerdene."
Hemserekê Pêroyî yê DEM Partî Tuncer Bakirhanî cewab dabi vengdayîşê Bahçelî û vatbi, "Ma sey DEM Partî wazenê şêrê Îmralî û semedê çareserîye Ocalanî reyde pêvînayîş bikerê."
DEM Partî seba ke Ocalanî reyde pêvînayîş bikero eynî roje Wezaretê Edaletî rê muracat kerd.
Wezaretê Edaletî aşmêk ra dima cewab da muracatê DEM Partî û heyeta DEM Partî ke mîyan de Pervîn Buldan û Sirrî Sureyya Onder estbî 28ê Kanûne de Girava Îmralî de Ocalanî reyde pêvînayîş kerd.
Dima ra Ahmet Turk zî beşdarê heyete bi. Waştişê Ocalanî ser Onder, Buldan û Ahmet Turk partîyanê sîyasîyan reyde dest bi pêvînayîşan kerd.
Heyete heta nika MHP, Partîya Gelecek, AKP û Partîya Saadetî reyde pêvînayîş kerd.
Heyeta Îmarlî bade zî Herêma Kurdistanî de Serekê YNKyî Bafil Talabanî, Kubat Talabanî û yê PDKyî Mesûd Barzanî, Nêçîrvan Barzanî û Mesrûr Barzanî dir pêvînayîş kerd.
