Heyeta Îmralî û Serekwezîrê Herêma Kurdistanî Mesrûr Barzanî ewro ameyî têhet
Heyeta DEM Partî yê Îmralî, pêvînayîşê xo yê Abdullah Ocalanî reyde dima, zîyaretanê xo rê dewam kena.
Heyete çarçewaya nê pêvînayîşan de şîy Başûrê Kurdistanî. Heyete Mesûd Barzanî û Serekê Herêma Kurdistanî Neçîrvan Barzanî reyde ameybî têhet.
Heyeta Îmralî vizêr Sileymanîye de Serekê Yewîtîya Nîştimanî ya Kurdistanî (YNK) Bafil Talebanî reyde zî pêvînayîş kerd. Hetkarê serekwezîrê Herêma Kurdistanî Qubad Talebanî zî kombîyayîşî de amade bi û kombîyayîş yew saete û 15 deqeyî ramit.
Heyeta DEM Partî ya Îmralî Sileymanîye ra agêra Hewlêr û ewro Serekwezîrîya Herêma Kurdistanî Serekwezîr Mesrûr Barzanî reyde amey yew ca.
Ofîsê Çapemenîye yê DEM Partî eşkera ker ke pêvînayîş 45 deqeyî dewam kerdo.
Heto bîn ra Serekwezîrîya Herêma Kurdistanî zî derheqê pêvînayîşî de beyanat da.
Goreyê beyanatê Serekwezîrîya Herêma Kurdistanî, Heyeta Îmralî derheqê pêvînayîşanê Abdullah Ocalanî de melumat da û fikir û pêşnîyazê Mesrûr Barzanî yê derheqê prosesî de girewtî.
Heyeta Îmralî de Pervîn Buldan û Sirrî Sureyya Onder, Hemserekê DBPyî Keskîn Bayindir, endamê Buroyê Huquqî Ozgur Erol û Îbrahîm Bilmez, Berdan Ozturk û parlamenterê DEM Partî Gulcan Kaçmaz Sayyigit û Mehmet Kamaçî ra yena pê.
Heyeta DEM Partî ya Îmralî pêvînayîşanê xo yê Başûrê Kurdistanî qedênayî û do ewro agêro Tirkîya.