Kedkarê edebîyatê Zazakî Murad Canşad, badê 30 serran hepisxaneyî ra vejîya.
Goreyo ke ame zanayîşMurad Canşad do des rojan ra dima reyna teslîm bibo hîrê aşman dima reyna heyet do qerarêko newe bido derheqê ey de.
Murad Canşadî ke o bi xo dêrsimij o, hepîsxaneyî de zî bi ziwanê ma xeylê nuşteyî û kitabî nuştî. Canşadî tewr peyên serra 2018î de eserê Ehmedê Xanî yo namdar “Mem û Zîn” zî çarnabi ziwanê ma û no şaxeser lîteraturê zazakî rê daybî qezenckerdiş.
Nuştox û cigêrayox Mutlu Canî Zazakî Newsî rê da pêhesnayene ke Murad Canşad zere ra vejîyayo û nika welatê xo Dêrsim de yo.
Koordînatorê Weşanê Pêroyî yê Zazakî Newsî Enwer Yılmazî derheqê tehlîyeya ey de hesabê xo yê X ser ra parekerdişêk kerd û va; Wa çimê şarê ma û heskerdoxanê ey roşnî bê.
Kedkar û nuştoxê ziwanê ma Murad Canşad o Dêrsimij badê 30 serran hepisxane ra vejîyayo. Wa çimê şarê ma û heskerdoxanê ey roşnî bê. Ma semedê xizmetê ey ê edebîyatî ke mîyanê çar dêsan de ziwanê ma rê kerdo, ci hurmet kenê. pic.twitter.com/qoLlMPKBIM
— Enwer Yılmaz (@enwer_yilmaz) September 13, 2024
Murad Canşad kam o?
Murad Canşad, serra 1974 de dewa Gendanî ya qezaya Pulurî (Ovacık) ya Dêrsimî de, mezraya Derwêşan de ameyo dinya. Domantîya xo tîya vîyarnaya. Wendişê xo yo verên û mîyanên Pülümür Y.İ.B.O de wendo. Dıma ra Xarpêt de wendişê xo yo berz qedêna. Serra 1993 de Unîversîteya Îstanbulî de Fakulteya Zanistanê Sîyasî de dest bi wendişî kerd. Serra 1995 de ame tepiştiş. Badê prosesê mehkema cezaya hepsê ebedî girewt. Canşadî zindanî de dest bi nuştişê Kirmancki (Zazaki) kerd. Nuştoxî xeylê kovar û rojnameyanê cîya-cîyayan de hîkaye û meqaleyê xo yê Zazaki û Tirkki weşanayê.
Eserê ey
Xafilbela, Weşanxaneyê Vateyî, Hîkaye, Kirmancki (Zazaki), Îstanbul, çapa 2. 2014 (çapa 1. 2008), 98 rîpelî
Hesê Mişî, Weşanxaneyê Roşna, Dîyarbekir, 2013, 80 rîpelî
Waştî, Weşanxaneyê Roşna, Dîyarbekir, 2015, 80 rîpelî
