ZAZAKÎ NEWS - Serekê Kolombîya Gustavo Petro ewro Xî ra îlan kerd ke muzakereyê aştî yê ke Artêşa Xelasîya Neteweyî (ELN) reyde kenê, ameyê vindarnayene.
Petro verê ke vindarnayîşê muzakereyanê aştî îlan biko, ELN bi sûcanê şerî sucdar kerd.
"Prosesê dîyalogî yo ke ELNyî reyde bîyo, ameyo vindarnayene, a grûbe seba aştî qet îrade nîşan nêdana."
Çekdaranê ELNyî Pancşeme de bi hawayêko tewr kêmî 5 kesê verênê FARCî yê ke serra 2016î de peymana aştî de ca girewtbî, kiştî.
A grûbe êrîşê EMCyî kerd ke o zî grûbêka muxalîfa ya FARCî ya û hikûmet reyde muzakereyê aştî kena.
Muzakereyê aştî yê ELN û hikûmetî serra 2022î de reyna dest pêkerdbî, la darbe werdbî nê muzakereyan.
ELNyî aşma Êlule de nêzdîyê sînorê Venezuella de bi teqayîşkaran êrîş viraştbî û netîce de 2 eskerî amebî kiştene û 29 eskerê bînî zî birîndar bîbî.
Nê hedîseyî ra dima hikûmetî muzakereyê ke ELNyî reyde kenê, vindarnabî.
ELNyî fealîyetê sey remanayîşê merdimanî, teqnayîşê xetanê petrolî û êrîşanê vera hêzanê emnîyetî dewam kerdî.
Hikûmetî rojavayê veroyê welatî de dest bi muzakereyê cîyayî yê ke grûbêka ke ELNyî ra cîya bîya reyde kerdbî û pêvînayîşê ke ELNyî reyde bi hawayêko pêroyin vindartî.
Çime: Reuters
