Serdozgerîya Komare ya Îstanbulî çarçewaya tehqîqato ke dayo dest pêkerdene de bi îdîaya ke "propagandaya rêxistine kerda" îfadeya Melîsa Sozene girewte.
Rêzefîlmo ke nameyê ci "Le Bureau des Légendes" o serra 2017î de amebi weşanayene û sezonê hîrêyine yê rêzefîlmî de kaykerdoxe Melîsa Sozene sey endama YPJyî rol girewtbî. Sozene seba ney îfade da.
Ameyo îdîakerdene ke Sozene îfadeya xo de wina vato: "Mi nêzanayêne ke cil û bergê ke mi daybî xora nîşaneyê rêxistinêk ê. Mi no rêzefîlm de rolê ajantîye kay kerdêne. Rêzefîlm Tirkîya de nêame weşanayene, ez kesêka ke welatê xo û şarê xo ra hes kena ya."
Sozene verê zî hesabê xo yê medyaya komelkî de dîyar kerdbi ke rêzefîlm de pesnê rêxistinêk nêameyo dayene û a îftîrayanê ke aye rê yenê kerdene qebul nêkena.
Kaykerdoxa namdar Melîsa Sozen sezonê hîrêyine yê rêzefîlmê "Le Bureau des Légendes"î de rola sereke kay kerda.