Resul Yıldırım
Goreyê vatişan ra Sahabeyanê Resullahî ra Ebu Derda yeno verê Resulullahî û ey ra wina perseno,
Ya Resulullah! Ka Mumîn/Bawermend eşkeno şerab bişimo?
Resulullah vano eşkeno bişimo.(beno ke kewto gune, beno ke xeletî kerda)
Ebu Derda reyna perseno û vano,
Ya Resulullah! Ka Bawermend eşkeno dizdîye bikero?
Resulullah vano eşkeno bikero.(Beno ke şaş bîyo, beno ke xeta kerda)
Ebu Derda reyna perseno,
Ya Resulullah! Ka Bawermend eşkeno zîna bikero?
Resulullah vano eşkeno bikero. (Beno ke bîyo esîrê nefsê xo, beno ke xeletî kerda)
Ebu Derda reyna perseno,
Belê Ya Resulullah! Ka Bawermend eşkeno zuran bikero?
A game vanê Resulullah paştê xo şanaybî dêsî û cadî xo raşt kerd, seke tayê hêrs bibo û va,
Nexêr! Bawermend Zuran nêkeno.
Aqilê mi nêgêno ke ma sênî xo ra vanê musluman û ma nê peyxemberî dima şinê û reyna ma wina zuranê bêbinan kenê. Eke ZURE hende çîyêka tayê bibayne Ka Resulullah vajo Bawermend eşkeno zuran zî bikero labelê ey zanayne ke ZURE karê ruhî ya, karê kesayet û karê zerrî ya. Seba ey va, “nexêr! Bawermend Zuran nêkeno.” Serê ena serebute ma nêeşkenê vaje ke Bawermend eşkeno şerab bişimo yan zî zîna bikero Resulullah tîya de zano ke merdim car car keweno dexfika nefsê xo û guneyan keno labelê ZURE wina yew çîyêka ke sey urî ganê merdimî heme dekena binê têsîrê xo. Kesayetê ey xerepnena ey kena bêkesayet û veradana. Uca ra pey merdim ZURAN û Negeyan xo rê keno serlewha. Pîlan ra bi qijan, xortan ra bi camêrdan, cinîyan ra bi keynekan herkes ey rê beno materyalê ZURAN.
ZURE, nêweşîya komelan a ke sey qotikî dana înan ro û înan ferc kena, înan zere ra helesnena û qedînena û eynî wextî de nêweşîya ma ya zî. Zure yew xerepnayîşê kesayetî/şexsîyetî ya. Seko ke qotik dano beşîlayan/petêxan ro dana zerrîya însanî ro û ruhê ey xerepnena, kesayetê ey xerepnena û ziwanê ey xerepnena heta ke ey kena sey yew makînaya ZURAN.
Çi heyf ke nê makîneyê Zuran û atolyeyê negeyan tewr zaf zî ha medyaya civakî/sosyalî de yê. Fotoşopan û xeberanê bêbinan ser o însanan binê zen û baranê giranan de veradanê. Kîn û nefretê xo heme medyaya civakî de sey kutiko ke qiduz beno û wexto ke awe vîneno kef dekeweno fek û qelibneno, qelibnenê. Îcab nêkeno ti rîyê înan vînê çunke zuran û negeyan û kîn û nefret rîyê înan sîya kerdo.
Çi heyf ke çend rojanê peyînan de ma vînenê ke keyneka bêbexte Narîne ser o çi zuran kenê bi şarê kurdî, medyaya civakî de. Ê Kesî nêvanê ke na keyneka bêzar û bêziwan ameya kiştiş, nêvanê ke qetil bîya û erzîyaya mîyanê awa çemî. Vejîyenê zuranê xo rê û kîn û nefretê xo rê koletî kenê. Tîya de yew qetil est o û her kam beno wa bibo eke kamî kerdo qetilkar o. Ganî zuran û negeyan ma yew kîşt de verade û ma wina vaje “herunda na keyneka bêbexte de belkî qijê ma bibayne û wexşîkî qetil bibayne.” Eke eyro ma verbi na mesela de heqdar û raşt nêvinde Homa nêkero siba zafî Narînî mirenê. Çi heyf ke heta eyro zaf Narînî zî merdê. Ganî însanan bivatêne na gedaya belengaz û rindeke bî qurbanê xirsane yê pîlan û dehwayan. Ganî ma qetilkarê aye lexnet bikerdêne, şermezar bikerdêne la çi heyf ke tayê însanan aye kerd materyalê reytînganê qenalanê xo, tayê însanan aye kerd materyalê sîyasetê xo yo lexnet, tayînan aye kerd vînceyê fekê xo yo nebaş û boyîn, tayê însanan aye kerd materyalê hemberîya mîkrofonanê xo.
Heyf! hezar carî heyf ke kesî nêva ke lexnet bi xirs û sîyasetê şima bo ke şima wina bêperwa û bêusul hereket kenê. Şima keyeyê ZURAN xerepna.
Zure, nêweşîya komelan ra ya û nêweşîya komela ma ya zî. Eke ma wazenê komelêka bisihet û semîmî awan biker ganî ma xo û qijanê xo ZURAN ra dur tepşê. No tewir ra ruh, kesayet û zerrîya ma zî dirîyîya zuran û negeyan ra dur manena û komelêka biemnîyet awan bena. Ma rê û qijanê ma rê ameyoxêko weşik qet bêîmkan nîyo. Ganî ma zaf bixebitî, ked bide û areqê çarî birişne nê wareyî de. Seba ke NARÎNE hîna weş yew cuye de bicuyî no lazim û mecburî yo.
14.09.2024