Mihemed Kurdî
Hetê ma de yew mesela esta ke sîyaseta ewroyîne ya Tirkîya tarîf kena. Pîlanê ma verê cû wina vatêne: "Hem melatî hem zî keşeyî têreyra nêbenê". Manaya nê vateyê verênan wina ya: Ganî merdim yan şêro mizgêfte yan zî şêro dêre, labelê wirdî pîya nêbenê.
Nê wextanê peyênan de Rojhelatê Mîyanênî de vurîyayîşê zaf muhîmî qewimîyênê, bitaybetî zî Sûrîye de. Nê vurîyayîşê ke qewimîyênê hende pîl ê ke çimê dewleta Tirkîya zî tersnayi. Çimkî hikmat û hemparê xo nê vurîyayîşan reyde Tirkîya de yew proses da destpêkerdene. Hikmat û hemparê xo vanê ke ma wazenê zereyê welatê xo de aştîyêka zereyî virazê, coka ma no proses da destpêkerdene. Aye ra zî dewlete badê serranê zaf dergan destûr da ke heyetê Partîya Demî şêro Girava Îmralî het, serekê PKKyî Abdullah Ocalanî reyde dîdar û kombîyayîşan virazê.
Gelo Armancê Tirkîya bi Nê Prosesî Çi yo?
Gama ke merdim qiseyanê rayedaranê dewleta Tirkîya goştareno, merdim fehm keno ke ziwanê înan yê aştîye nîyo, eksê ey înan yê înkar û tehdîtan o. Çimkî hikmat hetêk ra semedê aştîye wekîlanê kurdan şaweno hetê serekê PKKyî Abdullah Ocalanî, hetêko bîn ra zî vera kurdan de polîtîkayanê xo yê înkar û dişmenîye dewam keno. Sey ke wertê de prosesêk çin bo hikmat reyna qeyuman erzeno şaredarîyanê kurdan ser û sîyasetkaran tepişeno û erzeno zere. Temsilkarê hetê dewlete eşkera vanê ke PKK do pîlîya dewleta Tirkîya qebul bikero û bêşert çekanê xo bin erd bikero û do vajo ma êdî vera Tirkîya de şer nêkenê û do xo tesfîye bikero. Sewbîna yew rayîr û çareyê înan çin o.
Tirkîya na sîyaseta xo ya hişke û dişmenîye tenya vera kurdanê Bakurî de nê, eynî wext de vera Rojavayê Kurdistanî de romnena. Dewleta Tirkîya şew û roje bêvindertene êrişê Rojavayê Kurdistanî kena û hemê destkewteyanê kurdan xo rê kena hedef. Heta nika êrişanê Tirkîya ra teber zîyanê maddî yê pîlî, bi hezaran şarê sivîl ameyo kiştene. Tirkîya nê vana eno tût o, nê vana na cinî ya, nê vana no rojnameger o, nê vana no sîyasetmedar o, nê vana no hunermed o, kam bêro vernîya ci kişena. Tewr peyên verê hewteyek şanogero kurd yê namdar "Bavê Teyar" kişt.
Yanî tenya qisey nê, tevger û kerdişê dewleta Tirkîya zî yê aştîye nîyê.
Gelo No Senîn Aştî ya?
Badê şîyayîşê Beşar Esadî dewletanê mîyanneteweyî seba Sûrîya neweye bi hêzanê ke nika Sûrîye de yê reyde kombîyayîşî virazenê. Mîyanê ê hêzan de yo tewr demokrat, yo tewr însanî û yo tewr modern hêzê kurdan o. Têkilîya hêzanê kurdan bi heme dewletanê mîyanneteweyî reyde zaf baş a û xora zafaneyê ê dewletan hem hetê leşkeran ra hem zî hetê dîplomasî ra paştîya kurdan kenê. Temsilkarê kurdan zî kombîyayîşanê xo yê bi dewletanê mîyanneteweyî reyde vanê ma heta nika vera DAÎŞî û dagirkeran de erdê xo, welatê xo û şarê xo pawit. Coka ma wazenê nika ra dima zî ma erdê xo îdare bikerî, aye ra ganî Sûrîya neweye de yew statuyê ma kurdan bibo.
Raştîya xo de waştişê kurdan, waştişêko rewa û tebîî yo, çimkî kurdan erdê kesî dagir nêkerdo. Kurdî tenya wazenê ke erdê xo ser o serbest û azad biciwîyê û bi xo welatê xo îdare bikerê, nê ke şarê xerîb bikerê. Tirkîya ra vêşêr kes vera nê waştişê kurdan ê tebîî de vengê xo nêkeno. Labelê dewleta Tirkîya bi bahaneya ke Rojavayê Kurdistanî de PKK esta, şew û roje êrişê şarê ma kena, bitaybetî zî badê şîyayîşê Beşar Esadî êrişê xo yê Rojavayê Kurdistanî ser o zêdnena. Dewleta Tirkîya Sûrîye de û qada mîyanneteweyî de seba ke statuyê kurdanê Rojavayê Kurdistanî asteng bikero şew û roje û bi heme hêzê xo xebitîyena. Labelê semedê ke cehd û xebatê Tirkîya qada mîyanneteweyî de veng vejîyayê, na rey zî Tirkîya wazena ke bi rayîrê Abdullah Ocalanî kurdanê Rojavayê Kurdistanî bixapêno û statuyê înan asteng bikero.
Yanî armancê Tirkîya Bakurê Kurdistanî de zî aştî nîya, tenya xapênayîş a, çimkî Tirkîya estbîyayîşê kurdan xo rê sey tehluke vînena. Raştîya xo de tîya de helwêstê Ocalanî û Partîya Demî zaf muhîm ê. Çimkî nê tehdîd û êrişê Tirkîya yê ke ma vînenê bêguman înan (Ocalan û Partîya Demî) zî vînenê, coka nê prosesî de helwêstê înan do dîyarker bo. Qerarê ke înan bidê, beno ke înan çimê şarê kurdî de berz zî bikero yan zî Homayî mekewo beno ke çin zî bikero.
Labelê çi beno wa bibo ganî dewleta Tirkîya baş bizano, ma kurdî pêro yew ê, bitaybetî şarê ma yê Rojavayê Kurdistanî û yê Bakurê Kurdistanî merdimê yewbînan ê, waya û birayê yewbînan ê. Coka nêbeno ke şima tîya de (Bakur) ma rê vajê bira û Rojavayê de zî waya û birayan bikişê. Û ma bi ê zurê şima yê aştîye bawer nêkenê, çimkî ne ziwan û vatişê şima yê aştîye yê û ne zî kerde û tevgerê şima. Ma kurdî seba kesî tehluke nîyê labelê şima seba merdimîye, seba kurdan, seba dinya, seba tebîetî û seba heywanan tehluke yê, çimkî şima xo, ziwan û şar û welatê xo ra vêşêr kesî nêşinasnênê.
Raştîya xo de eke dewletêk birayêne û aştîye biwazo, o wext ganî fek êriş û tehdîdanê xo ra verado. Yan zî ma vajê eke dewletêk şew û roje êrişê şarêk bikero û înan bikişo, o wext o zî ganî behsê aştîye û birayêne nêkero. Çimkî hetêk ra aştî û heto bîn ra zî tehdîd û şer û pêrodayîş nêbenê.