Dibistananê 7 eyaletanê Almanya de dersê kurdkî yeno dayîş û nêzdîyê 2 hezar û 600 wendoxî dersê kurdkî gênê.
Goreyê xebera Dîyarnameyi ke Zekî Ozmen amade kerda, dibistananê 7 eyaletanê Almanya de dersê kurdkî yenê dayîş.
Perwerdeyê eyaletan goreyê rewşe yewbînan a vurîyeno
Almanya de perwerde û îdarekerdişê dibistanan girêdayeyê wezaretanê perwerdeyî yê eyaletan o ke pêro pîya 16 eyaletî estê.
Sîstemê perwerdeyî yê her eyaletî wayirê xususîyetê xo yo û hetanî astêk zî yewbînan vurîyenê.
Warê dayîş û heqê dersanê kurdkî de zî rewşa pêro eyaletan yewbînan ra vurîyena.
Dayîşê dersanê kurdkî serranê 1990î de dest pêkerd
Goreyê texmînan, Almanya de nika nêzdîyê 3 mîlyonî kurdî ciwîyenê.
Eyaleta Bremenî destpêkê serranê 1990î de sey verên eyalet dest bi dayîşê dersanê kurdkî kerd û no kar ewro zî uca dewam keno.
Dima, tayê eyaletê sey Hamburg, North Rhine-Westphalia, Bremen, Niedersachsen, Berlîn, Brandenburg, Rheinland-Pfalz zî dest bi dayîşê dersanê kurdkî kerd.
Goreyê na xebere, nika (sezona wendişî ya 2024/2025) 7 eyaletan de nêzdîyê 2 hezar û 600 gedeyê kurdan şinê dersanê kurdkî.
Nê dersî, tayê eyaletan de çarçewaya "Dersê Ziwanê Dayîke" de û tayênan de zî sey "Dersê Ziwanê Xerîbî" yenê dayîş.
97 dibistanan de dersê kurdkî yeno dayîş
Bi pêroyî, 97 dibistananê 7 eyaletan de dersê kurdkî yenê dayîş.
Heto bîn ra 30 mamostayê dersê kurdkî nê dibistanan de wezîfedar ê.
Meaşê mamosteyan zî zereyê bûdceya wezaretanê perwerdeyî yê eyaletan ra yeno vetiş.
Almanya de eyaleta ke verên dest bi dersanê kurdkî kerdo Bremen bîya û ya ke tewr peyên dest pêkerdo zî eyaleta Saarlandî bîya.
