Xelata Heinrich Mannî ke Akademîya Huneran a Berlînî wareyê edebîyatî de dana, emser dîya nuştoxe kurde-almane Mely Kiyak.
Weşanxaneyê Hanserî da pêhesnayîş ke Xelata Heinrich Mannî ke her serre wareyê edebîyatî de yena dayene, dîyaya Mely Kiyak.
Xelata ke erja aye 10 hezar euro ya, do 25ê Adara 2025î de, di rojî verê rojbîyayîşê Heinrich Mannî, Meydanê Parîsî de Akademîya Huneran a Berlînî de bêro dayene.
Goreyê vatişê DWyî jurîya xelatî, derheqê dayîşê xelatî Kiyakî de îzehato ke kerdo de vato: "Mely Kiyak bi nuşteyanê xo bîye vengêka muhîme ya entellektuelî ya komelê almanî."
Mely Kiyak ke keyna yew keyeyê kurdî ya ke Tirkîya ra bar kerdo şîyo Almanya, serra 1976î de nêzdîyê Bremenî de ameya dinya.
Kiyake ke serra 2005î de Unîversîteya Leipzigî de perwerdeyê edebîyatî qedênayo, cuya xo sey nuştoxe û rojnamegera serbeste dewam kerda.
Kiyake serra 2012î de Xelata Theodor Wolffî, serra 2021î de Xelata Weşankarîya Edebî ya Kurt Tucholskyî û serra 2022î de Xelata Edebîyatî ya "Christine" a Cinîyanê Weşankaran heq kerda.
