Kayê akerdişî yê Festîvala Tîyatro ya Amedî ya 10. ke Şaredarîya Amedî ya Şaristanê Girdî organîze kena, Romeo û Juliet' (Niha Çawa ye?) eleqeyêko weş dî û Hemşaredare Serra Bucak ke kay temaşe kerd, vilî dayî kaykerdoxan.
Tîyatroya Şaristanî ya Şaredarîya Amedî ya Şaristanê Girdî (DBŞT) ke binê banê Serekîya Daîreya Kulturî û Karanê Sosyalî de xebatan kena, emser bi sloganê "Çiraya Me Geş Dibe (Roşnîya Ma Zêde Bena)" Festîvala Tîyatro ya Amedî ya 10. organîze kerd û roja diyine de prömîyerê akerdişê kayî pê Romeo û Juliet (Niha Çawa ye?) dewam kerd.
Kay, ke hetê DBŞT ra virazîyabi û Ruknettin Günî rejîsorî kerdbî, tede Ömer Şahin, Elvan Koçer, Özcan Ateş, Nurşen Adıgüzel, Perinaz Delazy û Sena Özbey rol girewtibi, Merkezê Kulturî û Kongre yê Çand Amedî de ame sahnekerdene. Temaşekerdoxan pê eleqeyêko weş kay temaşe kerd.
Hemşaredara Şaredarîya Şaristanê Girdî Serra Bucak, Hetkarê Sekreterê Pêroyî yê DBB Özgür Yıldız, Serekê Daîreya Kulturî û Karanê Sosyalî Zeynep Yaş û xeylê heskerdoxanê tîyatroyî kayî temaşe kerd
Kayî de ke "Eger qehremanê eserê namedarî yê William Shakeaspeareyî Romeo û Juliet biresayêne pê, cuya înan ewro do senîn bibo?" ame şîrovekerdene û pê terzêko henekine ame îfadekerdene.
Kaykerdoxê tîyatroyî Özcan Ateşî, badê kaykerdişî ê ke kay de keda înan est bî davet kerd sahne ser û înan rê sipas kerd.
Hemşaredare Bucak: Pirkerdişê salone zaf erjîyaye yo
Hemşaredare Bucak badê kayî şîye sahne ser û vilî dayî kaykerdox û ekîbe, û wina qisey kerd: "Meymananê erjîyaye, heskerdoxê tîyatroyî, ma zerrî ra sipas kenê pêro embazanê xo rê, kaykerdoxê DBŞT û Tîyatroyê Şaristanî yê Şaredarîya Şaristanê Girdî, ke na prömîyerê nê kayî viraşt. Vizêrî festîvalê ma dest pêkerd, pirkerdişê nê salonan hetê pêroyê heskerdoxanê tîyatroyî ra, ma rê zaf erjîyaye yo. Ez heme kesan rê kede û hetkarîya înan sipas kena."
Do hetanî 4ê Gulane dewam bikero.