Rêxistinê cinîyan vera kişyayîşê Evîn Demîrtaş vengdayîş kerd û va ke ê bi felsefa "Cinî, Cuye, Azadî" vera kişyayîşê cinîyan têkoşînê xo ramnenê.
Platforma Cinîyan a Dîcle Dîyarbekir, Tora Têkoşîna vera Şîdete, derheqê Evîn Demîrtaş a ke 22ê Teşrîne de taxa Huzurevlerî ya Peyasa Dîyarbekir de hetê Abdullah Şehmûsoglû ra ameybî kiştiş, beyanatêk da çapemenî.
Beyanat verê Edlîya Dîyarbekirî de ame dayîş û resimê Evîn Demîrtaş ameyî berzkerdiş. Parlamentera DEM Partî ya Dîyarbekirî Adalet Kaya zî beşdarê beyanatî bî.
Endama Merkezê Heqanê Cinîyan a Baroya Dîyarbekir Cansel Atalay nameyê cinîyan ser beyanat wend.
'KIŞTOXÎ BI NAMEYÊ 'NAMÛSÎ' BÊCEZA MANENÊ'
Atalay behsê kişyayîşê Evîn Demîrtaş kerd û ard ziwan ke sebebê zêdebîyayîşê nê kiştişan canêardişê mesûlîyetanê dewlete yo û va: "Wexto ke ma ewnîyenê peynîya kerdoxan ma şênê na rastî bivînî. Kerdoxo ke seserrê 1970î de bi nameyê 'namûsî' cinîya xo ya verêne kışta, tenya 8 aşmî hepisxane de mend. O wext bi qanûnan şîdeto ke ser cinîyan de bi semedê 'namûsî' cezayê ey amebi kêmkerdene û kerdox bêceza mendbi. La bi sayeyê têkoşînê rêxistinbîyayîşê cinîyan na rewşe vurîya. Bi mucadeleyê tevgeranê cinîyan qanûnî ameyî vurînayîş."
Parlamentere Adalet Kaya zî qisey kerd û dîyar kerd ke kiştişê cinîyan polîtîk ê û wina va: "Ma rewşa ewroyîne ya ke Tirkîya de yena ciwîyayene û hetê komelî ra yena qebûlkerdene ra hêrs ê. Ma nê polîtîkayan qebûl nêkenê."
Daxuyanî bi berzkerdişê dirûşmeya "Cinî, Cuye, Azadî" ya qedîya.