Kongreya Amedsporî vizêr amey kerdiş û Burç Baysal bi 7. Serekê Amedsporî.
Tima Amedî ke Liga Yewin a Federasyonê Futbolî yê Tirkiya de kay kena, kongreya xo kerd.
Kongre Merkezê Kongreyanê Sezaî Karakoçî de ame viraştiş.
Amedspor ke 353 delegeyê ci estê, yew lista ra şi weçinayişan.
Kongre de serekê verênî Azîz Elaldi, Hemserekê Şaredariya Bajari ya Girdî ya Amedî Dogan Hatun, Serekê Odaya Senayî û Ticaretî ya Amedî Mehmet Kaya û zaf berpirsiyar û endamê saziyanê komelê şarî yê Amedî beşdar bîy.
Kongre de Serekê Heyetê Mişewreyî yê Amedspori Burç Baysal sey Serekê neweyî yê Kulubê Amedspori ame weçinayene.
Tima Amedspori ke çend rojî verê cû antrenorê ci Ersun Yanal ci ra aqitiya û Servet Çetîn bi antrenorê ci yo newe, peyniya nê wextan de rewşêka zor ra viyarena û hesreta serkewtinanê xo yê verênan ancena.
10 serrî ra dima par bibi şampiyone û vejiyaye Liga Yewin la nê wextanê peyênan de performansê ci bi zerrîya taraftaran û heskerdoxanê xo nîyo.
Amedspori emser 12 kaykeridişan de tenya 3 serkewtiş dest fîna, 5 kaykeridişan de netice seyyewbin girewt û 4 kaykerdişan de ki vindî kerd.
Amedspor mîyanê 20 timan de rêza 17. de yo.
Taraftarê Amedspori pawenê ke îdarekerê newe gamanê stratejikan bierzê û înan peyser biyaro performansê xo yo verên.
