Mudirîya Pêroyî ya DÎSKÎ ya Şaredarîya Amedî ya Şaristanê Girdî seba ke merkezê şaristanî û Farqîn û Erxenî rê binawanîyêko xurt awan biko, 72 mîlyon euro hîbe arê da û seba 6 projeyanê girdan prosesê îhale da destpêkerdene.
Mudirîya Pêroyî ya DÎSKÎ seba çareserkerdişê problemanê binawanîya şaristanî ke serra 2014î de Şaredarîya Amedî ya Şaristanê Girdî xo rê kerdbî rojeve, 11 serran dima dewam kena. Aşma çeleyî de, prosesê hîbedayîşî bi îmzayanê mabênê Mudirîya Pêroyî ya DÎSKÎ, Îlbank û sazgehanê eleqedaran de qedîya û prosesê îhaleyê projeyan dest pêkerd. Çarçewaya hîbeyê 72 mîlyon euro de ke bi xebata DÎSKÎ ame peydakerdene, pê bi pêroyî 6 projeyî do bêrê viraştene: 2 hebî Farqîn de, 3 hebî Erxenî de û 1 hebe merkezê Amedî de.
Çarçewa û amancê projeyan
Tesîsê Awguznayîşî yê Amedî - Qademeyê 2. û depoyê 20 hezarî metrekupî, Tesîsê Awguznayîşî yê Awa Lêmine yê Farqînî, xeta şebekeyê kanalî û awa varanî ya Farqînî, Tesîsê Awguznayîşî yê Awa Lêmine yê Erxenî û xeta şebekeyê awa şimitişî, kanalîzasyonî û awa varanî do bêrê awankerdiş.
Bi Tesîsanê Awguznayîşî yê Awa Lêmine yeno hedefkerdene ke awa lêmine bêro aridnayene û bê ke zerar bido tebîetî bêro veradayene. Bi projeyanê awa şimitişî hedefê serekeyî ke birîyayîşê awe kêmî biko, awa pake û weşe bêro temînkerdene. Projeyanê awa lêmine û awa varanî reyde yeno hedefkerdene ke vernîya laseran bêro girewtene û problemê binawanî kêmî bibê.
Kapasîteyê Tesîsê Awguznayîşî yê Awa Şimitişî do bibo qatî
Çarçewaya projeyanê Qademeyê 2. û depoyê 20 hezarî metrekupî de, Tesîsê Awguznayîşî yê Awa Şimitişî yê Merkezê Amedî de hewza îlaweye ya fîltrasyonî û denişnayîşî do bêrê viraştene. Bi nê projeyan ke kapasîteyê Tesîsanê Awguznayîşî yê Awa Şimitişî yê Merkezê Amedî di qatî zêde biko, yeno hedefkerdene ke awa şimitişî ya weşe zaf bêro teminkerdiş.
Erxenî de xeta awa şimitişî ya 252 kîlometre do viraziyo
Erxenî de ke bi nifûsê xo yê 139 hezarî ra vêşêrî yo û qezayanê ma ra tewr gird o, 3 projeyê girdî do bêrê kerdene ke binawanîya awa şimitişî, awa lêmine û awa varanî xurt bikê.
Projeyê Tesîsê Awguznayîşî yê Awa Lêmine ke DÎSKÎ do Erxenî de biko, amanc keno ke awa lêmine bi sîstemê modernî biawgûzno, zerarê ke do tebîetî rê bido, vernîya înan bigîro û tesîrê negatîfî yê ekolojîkî kêmî biko.
Projeyanê Awa Şimitişî yê Erxenî reyde, qeza rê 252 kîlometre şebekeyê awa şimitişî do bêro viraştene. DÎSKÎ, bi nê gaman problemê awa şimitişî yê qeza safî keno û şarî rê awa şimitişî ya hîna weşe resneno.
Çarçewaya "Projeyê Kanalî û Awa Varanî yê Erxenî" de ke DÎSKÎ seba îdarekerdişê awe projeyêka muhîme girewto xo ser, 270 kîlometre şebekeyê awa lêmine û awa varanî do bêro viraştene. Bi na proje hem vernî yeno girewtene ke awa lêmine zerar bido tebîetî hem zî vernîya laseran gêrîyeno.
Tesîsê Awguznayîşî yê Awa Lêmine yê Farqînî
Bi hîbeyê 72 mîlyon euro Farqîn de zî di projeyê cîyayî do bêrê kerdene. DÎSKÎ, na qeza de ke nifûsê ci 86 hezarî ra vêşêr o û tim gird beno, projeyê "viraştişê Tesîsê Awguznayîşî yê Awa Lêmine yê Farqînî û Xeta Şebekeyê Kanalî û Awa Varanî yê Farqînî" virazena.
DÎSKÎ do Farqîn de "Projeyê Tesîsê Awguznayîşî yê Awa Lêmine yê Farqînî" viraza. Bi nê xebatan awa gemarine ke çimeyê ci keye û endûstrîyel ê, bi xebata fîzîkî, kîmyayî û bîyolojîkî madeyanê zerarinî ra bêra pakkerdene û bê ke zerar bidê tebîetî bêrê veradayene. Bi "Projeyê Kanalî û Awa Varanî yê Farqînî" amanc o yo ke qeza de 117 kîlometre xeta şebekeyî bêra antene û binawanîya awa varanî bêra xurtkerdene ke vera tehlukeyê laseran de xover bido.
DÎSKÎ xebatanê xo dewam kena ke cayê ke binawanî bes nêkena, seba ke nifûs zêdîyeno û cayê şikîyayîşî yê neweyî virazîyayê, uca de probleman safî bika. Amed û qezayanê ci de binawanîya awa şimitişî û kanalîzasyonî xurt kena û dewam kena ke kalîteyê cuya şarî berz bika.
Çime: Bultenê Şaredarîya Amedî
