Şaredarîya Amedî ya Şaristanê Girdî, seba vîrardişê Nuştox Mehmed Uzunî ke edebîyatê kurdkî de yew nameyo muhîm o, yew rêze fealîyetî do organîze bikera.
Serekîya Daîreya Karê Kulturî û Sosyalan û keyeyê Mehmed Uzunî, bi fealîyetanê ke do bêrê organîzekerdene, Nuştox Uzun ke 11ê teşrîna verêne 2007î de heyatê xo vîndî kerdbî, do bîyarê vîrardiş. Mabênê 6-12ê teşrîna verêne de seba vîrardişê Uzunî nawitgehî, goşdarîya dengbêjan û qalîkerdişî do bêrê organîzekerdene.
Fealîyetî 6ê teşrîna verêne Yewşeme, saete 15.00î de Qada Fuaye yê Merkezê Kultur û Kongre yê ÇandAmedî de bi nawitgehî dest pêkenê. Qiseykerdişê akerdişî yê nawitgehî do Seyîthan Anter bikero.
8ê teşrîna verêne, saete 15.00î de "ciwîyayîşê Mehmed Uzunî, serranê surgûnî û nuştişê bi ziwanê dayîke" qalîkerdişêk do bêro kerdene. Qalîkerdişî de ke moderatorîya ci do Lal Laleş bikero, Mustafa Uzun, Seyîthan Anter û Mizgîn Ronak do beşdar bibê.
Vîrardişê Gorîstanê Berê Mêrdînî de
11ê Teşrîna verêne saete 12.00î de Mehmed Uzun, serê mezelê xo yê Gorîstanê Berê Mêrdînî de do bêro vîrardene. 12ê Teşrîna verêne saete 13.00î de Keyeyê Dengbêjan de seba vîrardişê Uzunî goşdarîya dengbêjan do bêro organîzekerdene.
12ê Teşrîna verêne saete 14.30î de Merkezê Kultur û Kongre yê ÇandAmedî de "Romanê Mehmed Uzunî û edebîyatî ser o qalîkerdiş" do bêro organîzekerdene. Qalîkerdişî de, Şehmus Dîken, Sîdar Jîr, Zara Uzun, Salîh Agir Qoser, Mahmut Îldogan do sey qalîkerdoxî beşdar bibê.