Qezaya Sirûcî ya Rihayî de avukat Yilmaz Bîrden o ke waştêne muwekîlê xo reyde pêvînayîş bikero rastê êrîşê polîsan o bi çek ame.
Baroya Rihayî meseleye ser hesabê xo yê Xî de beyanatêk vila kerd.
Yilmaz Bîrden o ke yeno dermankerdene zî do gerreyê polîsan bikero.
Goreyê malumatanê ke ameyê girewtene, Yilmaz Bîrden waştêne muwekîlê xo yo mudirîya Trafîkî ya Sirûcî de ameyêne tepiştiş reyde pêvînayîş bikero.
Ame îdîakerdene, wexto ke Bîrden waştişê xo yê pêvînayîşî de îsrar kerd, polîsan bi i çek da sereyê ey ro û o birîndar kerd.
Yilmaz Bîrden o ke birîndar bi Nêweşxaneyê Dewlete yê Sirûcî de yeno dermankerdene.
Avukatê Baroya Rihayî şîyê cayê bîyayîşî û bîyayiş qeyd kerd.
Polîsê eleqedarî îdîa kerd ke Bîrden "vera polîsan vejîyayo".
Yilmaz Bîrden do polîsanê ke dayo ey ro şîkayet bikero.
Baroya Rihayî beyanat da
Baroya Rihayî derheqê meseleyî de beyanatê da û îfade kerd:
"01.04.2025î de destûr nêame dayene ke embazê ma avukat Yilmaz Bîrden muwekîlê xo reyde pêvînayîş bikero.
Embazê ma rastê mudaxeleya fîzîkî yê personelê operasyonanê taybet û polîsan ame.
Înan embazê ma derb kerd û o birîndar bi û bi ambulans erşawîya nêweşxane.
Serekê Baroya ma avukat Abdullah Oncel, Merkezê Heqê Avukatan û Endamê Komîteya Rayberîye nê prosesî nêzdî ra teqîb kenê.”
