Mihemed Kurdî
Mîyanê şaranê mısılmanan de şaro tewr raşt û yo ke tewr zerrî ra girêdayeyê dînê xo yo, şarê Kurd o. Zaf şar û qebîleyan Îslam semedê menfeatanê xo bi kar ardo û bîyê wayîrê dewlete û zaf çîyê bînî bi dest vistê. Ma Kurdan zî heta nika bi zerrîyêka pake û bêmenfeat xızmeta îslamî kerda. La nê serranê peyênan de semedê dîyanet û melayan, îslamî ra dûrî kewtî û bi hawayêko eşkera propagandaya hikumatî kenê û zulmê hikumatî meşrû kenê, şarê Kurdî zî tay mızgeftan ra dûrî kewto, bi taybetî zî neslê newe.
Kurdistanî de, heta verê cû çend serran zî wexto ke aşma Remezanî amêne, cemaetî mızgeftî pir kerdêne, bi taybetî zî terawîh û xutbeyan de mızgeftan de ca nêmendêne. La ewro ma vînenê ke zafaneyê mızgeftanê ke Kurdistanî de yê, xeyrê çend kesan ra veng ê. Taye dewan de zî seba ke cemeat kêmî yo, xutbe nêno wendiş. Zaf cayan gama ke ma şinê mızgeftî, ma zî bîyê şahid ke mela waazanê xo de çinêbîyayîşê cemaetî ver gerreyan kenê û vanê çıra şar sey verê cû nîno mızgeftî?
Raşta cı zaf sebebê nêameyîşê cemaetî estê la semedê tewr girdî yo ke cemeat nîno mızgeftî, mela bi xo yo. Çımkî melayê ke girêdayeyê dîyanetî yê, mızgeftan de dînê Homayî nêvanê, dînê dewlete vanê. Dewlete zî yewperestîye ser awan bîya, tırk û tırkî ra vêşêr sewbîna şar û zıwanan nêşınasîyena û destûr nêdana ke xutbe bi zıwanêko bîn bêro wendiş. Coka zî zafaneyê melayê dîyanetî Kurdistanî de xutbeyan bi tırkî vanê. Homa/Allah Teala Quranê Kerîm, ayeta Rûm, sûreya 22ine de vano: "Xalıqnayîşê asîmanan û erdî, yewbînan ra cîyabîyayîşê zıwanan û rengê şıma delîlanê Ey (Homayî/Ellahî) ra yo." Yanî gama ke ma tenya biewnî nê ayetî, ma vînenê ke Dîyanet, Homayî, kıtab, sûre, ayet û qanûnê cı înkar keno. Ma Kurdî mızgeftan rê vanê keyeyê Allahî/Homayî, dîyanet û zafaneyê melayê cı zî keyeyê Homayî de qalê dînê zalim û munafıqan kenê.
Reyna dehkerey xutbeyê ke dîyanet bi melayan dano wendiş, eleqeyê cı bi Îslamî ra çin o. Seke nimûne, gama ke Tırkîya Rojava û sewbîna leteyê Kurdistanî de galê Kurdan kena, zafaneyê melayê dîyanetî bi dua û xutbeyê xo zulmê înan meşrû kenê û benê hemparê zulmê înan. No zî beno sedemê cıgêrayîşê şarê ma, çımkî hetêk ra erdê ma ser o de, ma kişenê û hetê bîn ra zî ewnîyenê zereyê çımanê ma û kıştoxê ma rê duayan kenê. Gelo no zulm nîyo, na rey ma do senî peyê ê melayan ke kıştişê ma helal kenê de nımaj bikerê?
Reyna bîyê çend serrî ke dîyaneta Tırkîya keyepela xo ya fermî ya dîjîtalî ser o de bi heşt zıwanan sey tırkî, Erebkî, Rûskî, Almankî, Îngılızkî, Feransızkî, Îspanyolkî û Îtalyankî xutbeyî estê, la Kurdkî çin o. Quranê Kerîm de vano: Homa, îhsan û edalet emir keno, xerabî û nêheqîye zî men keno. Ma Kurdî melayan rê vanê, wekilê peyxamberîye. Qaşo Tırkîya de dîyanet îslamîyetî temsîl keno, na rey eke dîyanet hende nîjadperestîye bikero, şarê bînî yê tırk do se bikero? Raşta cı çîyo ke dîyanet vera şar û zıwanê ma de keno nêheqîye nîyo, duşmenîye yo, çımkî keyepela xo ya dîjîtalî de ca dano zıwanê şarê xeyrê mıslîm la ca nêdano zıwanê Kurdê mısılmanî. A semed ra eke ma vajê dîyanet Îslamî temsîl keno, ma do gunehkar bibê.
Gama ke qada mîyanneteweyî de qalê heqê Kurdan beno, yan zî gama ke ma qalê yew heqê xo yê xozayî kenê, mela û temsilkarê dewleta Tırkîya vanê, ma pêro mısılman ê û birayê yewbînan ê yê dînî yê, ferqê ma yewbînan ra çin o. La raştî de zî tehemulê înan çin o ke bi Kurdkî yew xutbe bêro wendiş. Yanî zafaneyê mızgeftê Tırkîya zî sey heme dayıreyê dewletî yê bînî xızmeta pergalê yewperest kenê û badê vanê, çıra cemeat nîno mızgeftî?
Helbet mîyanê melayê dîyanetî de zî yê baş û erjayeyî ke Îslama raştî vanê zî estê, xora qestê mı înan nîyo û ez çı rey vera şîyayîşê mızgeftanê înan de zî nîya. Acızîya ma mela, mızgeft û Îslamî ra nîya, ma tenya ê kes û hetê ke nameyê dînê Homayî ser zulmî kenê ra acız ê. Bêguman sewbîna sebebê bînî zî estê ke şarê Kurd mızgeftan ra serd bîyo la mı nê nuşteyê xo de tenya qalê taye xeletîyê dîyanetî kerdî. Na rey hêvî û waştişê mı o yo ke aşma Remezanî şıma rê xêyr û bereket bîyaro û Homa Teala rojeyê ke şıma gênê qebûl bikero.
