Hemserekê Şaredarîya Akdenîzî ya Mersînî Hoşyar Sariyildiz û Nurîye Aslan ameyî tepiştiş.
Goreyê xebera Ajansa Mezopotamya (MA), polîsanê dormeleyê awanîya şaredarîye girewta vatê "Qeyûm ameyo tayînkerdene."
Hemserekê Şaredarîya Akdenîzî Hoşyar Sariyildiz û Nurîye Arslan û endamê Meclîsê Şaredarîye Ozgur Çaglar, Hîkmet Bakirhan û Neslîhan Oruç sereştişanê keyeyan de ameyî tepişayene.
Sebebê tepişîyayîşê hemserekê şaredarîye û endamanê meclîsî nêamo zanayîş.
Polîsan, nika dormeleyê awanîya şaredarîye bi barîyeran girewto.
Polîsan nêverda ke Parlamenterê Partîya DEMî yê Mersînî Alî Bozan şêro zerre bînaya şaredarîye.
"Qeyûm xespkerdiş o, dizîya îradeyî ya"
Alî Bozanî îfade kerd ke polîsî zerrê şaredarîye de cigêrayîş kenê û va:
"Polîsan nêverda ma şîrê zereyê bînaya Şaredarîya Akdenîzî û înan va ke qeyûmî qerarê qedexeyî dayo.
Polîsan ma rê va 'Qeyûm tayînê Şaredarîya Akdenîzî bîyo û do keyepelê walîtîya Mersînî de bêro parekerdiş.'
Qeyûm xespkerdiş o, dizîya îradeyî ya, ma qerarê tayînkerdişê qeyûmî qebul nêkenê."