Mehmûd Nêşite bi eslê xo dewa Licê Xosor mezraya Dikî ra yo. Nameyê ey yo raşteqîn mehmut Yörük o. 1915 de kalikê ey bar kerdo şîyo Silîvan. Sey edetê koçerîye, zimistanan merkezê Silîvan de hamnanan zî Xosor de mendêne. O bi xo 1945 de Dik de ameyo dinya. Xo hem silîvanij hem licêyîj hesibneno. Badê perwerdeyê verên, mîyanên û unîversîte 1963 de bîyo malim. 30 serrî mektebanê dewlete de malîmîye kerdo. 1968 de dekewto mîyanê îdareyê şubeyê TÖSî (Senadîkaya Malimanê Tirkîya) yê Silîvan. A game Rojen Barnas serekê şubeyê sendiqa yê Silîvan bîyo. 1974 de Silîvan de şubeyê TÖB-DERî (Komeleya Yewîya Malimanê Tirkîya) awan kerd.
Çar-panc serrî serekîya TÖB-DERî kerde. 1980 de surgunê Çorumî bi. Uca wazifeyê malimîya ra ame eştiş la dima reyna agêra gureyê xo ser û dest bi wazîfe kerd. Çorum ra şi Dortyolê Hatay. Ey û çend emabazanê xo uca şubeyê EĞİT-SENî (Sendîkaya Kedkaranê Perwerdeyî) rona. Çar-panc serrî Dortyol de serekîya şubeyê na sendiqa kerde. 1994 de malimîye ra teqawut bi. Teqawutbîyayîşî ra pey Dortyol de têpîzede new serrî serekîya şubeyê HADEP (Partîya Demokrasîya Şarî) û DEHAP (Partîya Demokratîke yê Şarî) kerde. Mehmûd Nêşite kovara kirmanckî (zazakî) Vate de xeylê kitabî nuştê û hîkayeyî nuştê. Bi serran endamê Grûba Xebaye ta Vateyî bi û hem Kovara Vateyî û hem zî Grûba Vateyî rê xizmetê pîlî kerdî.
Mehmud Nêşite 2022 de Dîyarbekir de dinyaya xo bedilna
Mîyanê kitabanê ey ra tewr kitabo ke yeno zanayîş û serekêko qîmetin o Çekêto sipî yo.
Kitabê ey:
- Qehremanîya Vîta Zingure / Weşanên Enstîtuya Kurdî ya Amedê / 2010
- Biza Kole Asnawî Kena / Weşanên Enstîtuya Kurdî ya Amedê / 2010
- Luya Rîsîyaye Û Ap Elî / Weşanên Enstîtuya Kurdî ya Amedê / 2010
- Çakêto Sipî / Weşanxaneyê Vateyî / 2012
- Rodî / Hîva / 2014
- Rodî Şono Parke / Hîva / 2015
Mehmûd Nêşiteyî demê cuyayîşê xo de Zazakî rê xizmetê pîlî kerdbî.
Mehmûd Nêşite yew nuşteyê xo wîna behsê muhîmîya ziwanê dayîke keno.
Şitê dayîkanê ma kurdan, xorînîya tarîxê mîletê ma ra yeno! Tede tehmê welatê ma tehmê kulturê ma tehmê ziwanê ma esto. Şitê dayîkanê ma kurdan de rence esta, zehmetî esta! Şitê dayîkanê ma de amênê mewcudîyetê mîletê ma, amênê mewcudîyetê însanetîya ma esto! Şitê dayîkanê ma de şan, şeref û namusê mîletê ma esto! Şitê dayîkanê ma de amênê ziwanê ma esto…
