Cuya emegdarê sînema, kayker û senaryonuştoxê Zaza Yilmaz Guneyî do sey film bêro antiş. Filmo ke Yuksel Aksu do derhênerîya ci bikero de, do Mehmet Kurtuluş rola Guneyî kay bikero. Film do cuya Guneyî, ardimê ey yê sînema û hîkayeya têkilîya ey ya cinîya xo Fatoş Guney ser o bo.
Semedê antişê fîlmê cuya sînamagîro Zaza o ke bi laqabê "Qiralo Çîrkîn" yeno şinasnayîş Yilmaz Guney, xebatî dest pêkerdî.
Yuksel Aksu do derhênerîya filmî bikero. Film do kitabê "Camî Bişiknê wa Mîrçikî Bixelesîyê" yê Fatoş Guney ra bêro antene.
Goreyê xebera Bîrsen Altuntaşî; senaryo hetê Fatoş Guney û Yuksel Aksu ra pîya ame nuştiş û Mehmet Kurtuluş bîyo kaykerê rolê serekeyî.
Mehmet Kurtuluş o ke 52 serre yo, bi fîlmanê sey "Muhteşem Yuzyil: Kosem", "Into The Night", "Hakan: Muhafiz", "Kelebekler", "Tereddut", "Mary", "8 Saniye", "Buyuk Oyun" yeno şinasnayîş.
Yeno zanayîş ke film do bi hîkayeya têkilîya Yilmaz Guney û Fatoş Guneyî dest pêbikero û wexto ke o xelata "Xelata Palmîyeya Zerêne" ya ke bi filmê "Rayîr"î sînemaya Tirkîya rê ard gêno biqedîyo.
Film de do Denîz Barut rola Fatoş Guneyî kay bikero.