Enwer Yılmaz
Welat de semede qedînayîşê pêrodayîşo ke 40 serrî ra zêdêr dewam keno gamêka tarîxî amey eştiş. Serekê PKKyî Abdullah Ocalanî, beyanatê xo yê peyênî ke Hepisxaneyê Îmralî ra da, veng da rêxistine ke wa çekan rono û xo fesix bikero. Na mesaja ke vizêr Îstanbul de hetê parlamenteranê DEM Partî ra amey dayîş, seba Tirkîya û welat hêvîyê aştî viraşt.
No vengdayîş, tena semedê qedînayîşê pêrodayîş û verdayîşê çekan ney, eynî wext de semedê destpêkerdişê prosesêko newe yê çareserkerdişê meseleya kurdî yê bi rayê demokratîkî, gelêk muhîm a.
Ocalanî mesajê xo de va "Ez veng dana ke wa çekî bêrê ronayîş û mesûlîyetê tarîxî yê nê vengdayîşî gêna xo ser." Ancî, îfade kerd ke ganî PKK kongreya xo bikero û xo fesix bikero.
No beyanat, semedê qedînayîşê pêrodayîşo ke bi serran o dewam keno sey gama muhîme yena vînayîş. No do prosese aştî rê berêko newe akero. Proseso ke bi vengdayîşê ortaxê Serekkomar Erdoğanî Serekê MHP Devlet Bahçelî dest pêkerd resa yew merhela ke dima vengdayîşê Ocalanî ame û nika gamê bînî yene pawitiş.
Labelê semedo ke aştî bibo memde û pêameyîşêk bibo, tena vengdayîşê ronayîşê çekan bes nîyo. Ganî waştişê şarê kurdî qanûnê bingehînî yê Tirkîya de bêrê garantîkerdiş, heqê kulturî û sîyasî bêrê hîrakerdiş û neheqîyê ke verê cû ameyê kerdiş bêrê raştkerdiş.
Ma vîzêr bîyê şahad ke Parlamenterê DEM Partî, Îmralî de pêvînayîşê Ocalanî dir ra dima, kombîyayîşê çapemenî de no vengdayîş pare kerd.
No vengdayîş, semedê pêameyîşê komelkî û çareserîya demokratîke reyna ard rojev. Wexto ke dewrêko newe seba ameyoxê Tirkîya abibo, prosesêko newe bê micadeleyê çekdarine eşkeno cayê xo bido dîyalog û prosesê çareserî.
Labelê semedo ke no proses serbikewo, hepisxane ra veradayîşê sîyasetmedaran ê ke bêheq hepisxaneyan de yê û bi viraştişê qanûnan, garantîkerdişê heqan muhîm o. Komelêko demokratîk de, veradayîşê kesan ke seba fikirê xo yê sîyasî hepisî yê, do ardim bido ke prosesê aştî bingehêko hîna saxlem ser o bêro viraştene.
Nika vengdayîşê Ocalanî sey roştîyêka hêvî yena vînayîş. Ma zanê ke feydeyê qedînayîşê atmosferê pêrodayîşî ke serranê dergan ra dewam keno ma kurdan rê esto en zaf. Labelê semedê çareserîya meseleya kurdî, tena ronayîşê çekan ê PKKyî ney, ganî heqê qanûnê bingehînî yê şarê kurdî binê garantî de bêrê girewtiş, heqê ziwanî, kulturî û nasnameyî bêrê dayîş.
Aştî, tena bi bêvengkerdişê çekan ney, bi viraştişê sistemêko adaletine û demokratîk ke tede pêro şarî wayirê heqanê seyyewbînan ê, mumkin bena. No semed ra, ganî nêro xovîrrakerdiş ke her gama ke bêra eştiş, ganî xizmetê aştîya komelkî ya memde û seypêbîyayîşî bikero.
Nika çimî ameyê çarnayene ke no vengdayîş pratîk de do senî bêro qebulkerdiş. Tirkîya de seba viraştişê ameyoxêko way-birayane û aştîyane gere pêroyê komelî bi aqilselîmî û hetkarî paştî bide nê prosese nêweyî.
Seke şarê ma vano; Her çî bixêr