Serra 2025î de zêdekerdişê ucretê asgarî û maaşê teqawutan ra dima, marketanê zincîrîyan ê Dîyarbekirî de fîyatê çî-çîyanê werdişî de berzbîyayîşêko pîl virazîyayo. Şar hema maaşanê xo yê zemkerdeyî nêgirewto, labelê çî-mîyê werdişî yê bingeyênî rê zem ameyo kerdiş. Na rewşe şarî mîyan de bîya sebebê hêrsêko pîl.
Zêdebîyayîşê fîyatan bêkontrol berz benê
Di aşmî verê cû rûno 5 lîtreyî 235 TL ra ameyêne rotiş, se ra 36,17 zêde bibi û bibi 280 TL. Labelê zemê maaşan ra dima marketanê zincîrîyan, se ra 14,28 reyna zem kerd û fîyatê ey berz kerd, kerd 320 TL. Bi no qayde mîyanê di aşman de rûn rê se ra 54,5 zem ame kerdiş.
Şar vano ke, marketî firsendgêrîye kenê û zemê maaşan kenê fersend.
Zemê ke ucretê asgarî û maaşê teqawutan rê bîyê
Serra 2025î de zemê ke ucretê asgarî û maaşê teqawutan rê bîyê wina ameyî eşkerakerdiş:
- Ucretê asgarî: Wezîrê Kar û Ewleyîya Sosyalî Vedat Işıkhanî da zanayîş ke ucretê asgarî yo safî se ra 30 zêde bi û bi 22.104 TL.
- Teqawitê SSK û BAG-KURî: Seba 6 aşmanê enflasyonî maaşê înan se ra 15,75 zêde bi.
- Memur û teqawitê memuran: Maaşê înan se ra 11,54 zêde bi.
Zemê ke ucretê asgarî û maaşê teqawutan rê bîyê, kaxid ser o yê. VanÊ ke, hedefê înan refahê şarî zêdekerdiş o, labelê zemê bêkontrolî yê ke xidayanÊ bingeyênan rê benê nê zeman pûç kene. Zaf keyeyê Dîyarbekîrî vanê ke, maaşê înan vera fîyatanê marketan helîyenê.
Ganî polîtîkaya zemî ya marketanê zincîrîyan bêra kontrolkerdiş û berzbîyayîşê xida binê kontrolî de bigîrîyo. Reyna, seba pawitişê heqanê şarî ganî gamê acîlî bêrê eştiş.
Şar mîyanê zehmetîya ekonomi de cuyeno labelê marketî bi zemê maaşan firsendgêrîye kene. Ganî îradekarî seba naye çareserî bivînê. Eke vernîya nê berzbîyayîşê ercan nêgîrîyo, problemê ekonomîkî do hîna xorî bibê.