Sazîya Îstatîstîkanê Tirkîya (TUÎK) netîceyê 2024î yê Sistemê Qeydê Nufusî yê goreyê Adresî eşkera kerd.
Goreyê ney, nufusê Tirkîya û bajaranê Kurdan ke serra 2023î ra nat 85 mîlyon û 372 hezar û 377 bi, par 292 hezar û 567 kesî zêde bi û vejîya 85 mîlyon û 664 hezar û 944 kesî.
Reyna hûmara nufusê camêrdan sey se ra 50,02 (42 mîlyon û 853 hezar û 110 kesî), humara nufusê cinîyan zî sey se ra 49,98 (42 mîlyon û 811 hezar û 834 kesî) amey qeydkerdene.
Hûmara zêdebîyayîşê nufusî ya 2023î hezar ra 1,1 bi, serra 2024î de bi hezar ra 3,4.
Nufusê xerîbanê ke Tirkîya de manenê, goreyê serranê verênan 89 hezar û 996 kesî kêmî bi û bi yew mîlyon û 480 hezar û 547 kesî.
Nufusê Îstanbulî bi 15 mîlyon û 701 hezar û 602 kesî
Nufusê Îstanbulî 45 hezar û 678 kesî zêde bi û resayo 15 mîlyon û 701 hezar û 602 kesî.
Îstanbul ke se ra18,3ê nufusê Tirkîya tede ciwîyeno, dima ey bi 5 mîlyon û 864 hezar û 49 kesî Anqara, bi 4 mîlyon û 493 hezar û 242 kesî Îzmîr, bi 3 mîlyon û 238 hezar û 618 kesî Bursa û bi 2 mîlyon û 722 hezar û 103 kesî Antalya yena.
Bayburt bi 83 hezar û 676 kesî bi bajaro tewr kêmnufus.
Dima nê bajarî, bi 86 hezar û 612 kesî Dêrsim, bi 91 hezar û 354 kesî Erdexan, bi 142 hezar û 617 kesî Gumuşhane û bi 156 hezar û 739 kesî Kîlîs yena.
Bajaranê Vakurê Kurdistanî ra ê ke nufusê înan tewr zêde yo nê yê:
Goreyê hûmaran, Riha bi 2 mîlyon û 237 hezar û 745 kesî rêza yewine de ya.
Dîlok bi 2 mîlyon û 193 hezar û 363 kesî rêza diyine de ya.
Amed bi 1 mîlyon û 833 hezar û 684 kesî rêza hîrêyine de ya.
Mereş bi 1 mîlyon û 134 hezar û 105 kesî rêza çarine de ya.
Wan zî bi 1 mîlyon û 118 hezar û 87 kesî rêza pancine de ya.
Bajarê Vakurê Kurdistanî yo ke nufusê ci tewr kêm o Dêrsim o
Reyna, goreyê hûmarav bajarê Vakurê Kurdistanî yê ke nufusê înan tewr kêm o nê yê:
Goreyê ney, Dêrsim bi 86 hezar û 612 kesî, Kîlîs bi 156 hezar û 739 kesî, Îdir bi 206 hezar û 857 kesî û Erzingan zî bi 241 hezar û 239 kesî mabênê bajaranê ke nufusê înan tewr kêm o de yê.