Hefteyo verên wezaretê Karê Zereyî yê Tirkîya reyna îredeya şarî cawit û qeyûm rona/eşt ser şaredarîyanê şaristananê Mêrdîn, Êlîh û qezaya Xelfetî ya Rihayî û meclîsa ê şaredarîyan zî fesix kerdê.
Seke ma pêro zî zanenê dewleta Tirkiya verê cû zî îradeya Kurdan xesb kerdibi û qeyûm ronabî şaredarîyanê Kurdan ser. La şarê Kurd her weçînayiş de wayîrê îradeya xwu vejîyeno û reyna şaredariyanê xwu gêno.
Gelo Çi rê Qeyûm ?
Verê her çî ganî ma vajê ke qeyûm xesbkerdişa îradeya şarî yo, çimkî demokrasî de merdimê ke şar weçînenê encax reyna şar eşkeno înan wezîfe de bigiro.
Şar weçînayîş de îradeya xwu beyan keno, kesê ke hetê şarî ra bêrê weçînayiş, ê benê îradeya şarî, Ena rey kam ke êyê ke wecînîyayîşan de weçînîyayî wezîfe ra bigêro, ê îradeya şarî cawenê. Xwu ra eke welatêk de mudaxeleyê weçînayîşan bêro kerdene o mihal çi manaya edelet û demokrasiyê nêmanenê.
Wezaretê Karê Zereyî yê Tirkîya hemserekê şaredarîyanê şaristananê (Mêrdîn, Êlîh û Xelfetî) bi endametîya rêxistine (PKK) sûcdar keno û vano, cezayê înan est ê. Raşta ci bingeha enê îdiayanê wezaretî çin ê, çimkî eke cezayê ê namzedan bibîyêne, xwu ra înan nêeşkayêne bibîyêne namzed. Çimkî Heyeta Berze ya Weçînayîşî (YSK) namzetîya merdimê ke sîcîlê înan pak nîyo qebûl nêkeno.
Heto bîn ra eke suçê hemserekê ê şaredaran bibê reyna zî nêbenê ke meclîsê ê şaredarîyan bêrê fesix kerdiş. Çimkî sûçê şaredaran ver heme meclîs nîno rabîyayiş. Coka ganî meclîsa ê şaredariyan mîyanê xwu de serekê newe biveçînê.
Tayînkerdişê qeyûman ra dima zaf şaristananê Tirkîya û Kurdistanî de razînêbîyayiş ameyê mojnayîş û nawnayîşî ameyî kerdiş. Bi taybet badê vêngdayîşê wekîl, şaredar û endamên partîye Dem'î, şarê Kurd vejîyayê meydan û bi dûrişmên/sloganên :"Biciwîyo Biratîya Şaran" vera naye neheqiyê de reaksiyonên xwû nawnayê. Ê nawnayîşan de zaf Kurdî hetê polîsan de ameyê tepiştiş û destekerdişê, nawnayîş biney cayan de hema dewam kenê.
Gelo Çi rê Biratîya Şaran ?
Dûrişma/slogana "Biciwîyo Birayîye Şaran" eno serranê peynîyan de fekê şar û sîyasetmedaranê ma ra nêkeweno. Bi taybet zî badê ke Partîye Demokratîk a Şaran (HDP) ameya saz kerdiş ra dima enê qal mîyanê şar û sîyasetê ma de zaf vila bîyo û reseyo daraxêko wina ke êdî tehm ra vejîya yo. Çimkî yê bi mal û ganê xwû bedel danê Kird ê la tayêne hetê nîyet xerab est ê naye têkoşînê Kurdan kenê yê şaran. Raşta ci yê ke zilm vînenê zî Kurd ê û yê ke vera zilmê de xover danê zî reyna Kird ê, yê ke îradeya înan xesb benê zî Kird ê û yê ke kuwayîş wenê zî reyna Kird ê. La ti ewnîyenî şarê Kird bi pêşengîye partîyê (Dem) hertim û her ca de naye sloganî (biciwîyo birayîye şaran) vanê la Kurdan ra vêşîyêr sewbîna şar zî meydan de çin o. Ena ray çi heqê şima est ê ke şima enê micadele û xoverdayîşa Kurdan kenê qûrbanîya birayîye şaran ?
Gelo gama ke şima (Dem) vanê, dewaya ma Kurdistan nîyo , demokratîk tirkîya yo, o çax tirk û hizbên înan bi şima bawer kenê? Ez yeqîn nêkena ke bi şima bawer kenê, çimkî yew hizbê tirkan zî nêwazenê şima reyde bêrê tê het, vanê şima verfekê terorê yê coka ma nînê şima het. Ena ray eke şima herinda enê sîyaset û sloganên veng de verê xwu bidê şar û tabanê xwu semedê şima hîna hol nêbenê ? Xwu vîra mekerê şarê ke veng danê şima û şima kenê wekîl û şaredar tena şarê Kird o, sewbînan şar nîyo. La şima şinê bi sîyaset û sloganên veng Kurdan fikrê neteweyî ra dûr fînenê.
Reyna çar rocî verê cû hemsereka pêroyî ya partîya Dem 'ê vat ke, " Vera tirkîbîyayîşê de astengê tewr pîl akp û mhp yê". Gelo eke raşta ci armanca Dem'ê tirkîyabîyayîşê Kurdan o, o çax ma çirê hende şehîd dayê, çirê ma hende laj û kêynayê xwu yê tewr erjaye kerdê binê herreyê? Eke armancêk Dem'ê yê wina çin o, çirê hemsereka înan a pêroyî wina vana? Gelo çirê cênîyêka ke Kurd nîya bena hemsereka pêroyî ya hizba Kirdan û nameyê Kirdan ser enê qalên veng vana ? Wa her kes baş bizanê ke çi havilê enê sîyasetî Kurdan û dewaya înan rê çin o û birayîye şaran zî xapînayîş ra vêşîyêr çîyêk nêdanê Kirdan.
Ganî yew dewa û rayîrê merdimî bibê û merdim seba dewa ya xwu aye rayîrê ser o şino,
Mêrdimê ke di zerîyê înan est ê peynî de wirdî zerîyan zî vîndî kenê û bê zerî manenê. Coka eke Dem zî nêwazeno bê zerî bimano ganî xwu rê yew rayîr biveçînê, yan birayîye şaran, yan zî dewaya Kurdistanî, çimkî nêeşkeno heqê wirdî dewayan ra zî bivejîyo, eno çîyêko eşkera yo, nimitkî nîyo.
11.11.2025 / Mêrdîn
E-maîl:mihemedkurd47@gmail.com