Cinîyanê ke endamê DEM Partî yê ameyî têhet û meşaleyan vejîyayê sûranê Amedî yê tarîxîyan ser Newroze pîroz kerd. Qiseykerdoxan va: "Emser do Newroz bibo Newroza aştî, azadî û huzurî."
Rayberîya Têgêrayîşê Cinîyanê Azadan (TJA) û DEM Partî de bircê Ben û Sen ê qezaya Sûra Amedî yê tarîxîyan ser bi meşale û erbaneyan Newroz ame pîrozkerdiş.
Parlamenterê DEM Partî, hemşaredarê Bajarê Girdî yê Amedî û yê qezayanê merkezî, endam û rayberê Rêxistinanê Bajaran yê DBP û DEM Partî, dezgeyê sivîlî yê komelkî û bi seyan kesî beşdarê pîrozkerdiş Newroze bîy.
Komêk bi dawil û zirne û deyîran vejîya suran ser û deyîrî vatî.
Dima koma bi meşale û erbaneyan şî sahne. Koma ke dima ra sûran ra amey war, bideyîr û dawil zirneyan govend girewte.
'Newroze do biba Newroza aştî û azadîye'
Dima ra Hemsereka DEM Partî ya Amedî Gulşen Ozer qisey kerde, Newroza kesanê ke beşdarê programî bîyî pîroz kerd û va: "Emser do Newroze do biba Newroza aştî, azadî û aramî."
Parlamentera DEM Partî Newroz Ûysal Aslan zî dima qisey kerd û wina va: "Heta ke axa ma azad bibo ma do bi ruhê Newrozî têbikoşê. Newroz wa şima hemîne rê pîroz bo."
Programê Newrozî bi girotişê govendî qedîya.
