Hemserekê veren ê HDPyî Selahattîn Demîrtaş prosesê neweyî ser va: "Dewleta Komara Tirkîya, dewleta Kurdan a zî."
Hemserekê veren ê HDPyî Selahattîn Demîrtaş ke nika tepişte yo, derheqê prosesê neweyî de yew nuşte vila kerd.
Demîrtaş îzah kerd ke, ê game bi game ver bi yew aştîya girde şinê ke do Rojhelatê Mîyanênî û seserra vero ser tesîr bikero la her kes bi guman o û sebebê tarîxî û rojane estê.
Selahattîn Demîrtaşî wina va:
"Zirarê ke seserre dewlete Kurdan rê kerdo û serewedaritişê Kurdan ê ke vera dewlete bîyê, her di hetî nêeşkenê yewbînî ra bawer bikerê.
Ancî sebebêko bîn zî, ma ver de weçînayîş esto û îhtîmalê bedilnayîşê qanûnê bingeyî esto.
Seba pîyaameyîşê sîyasîyan, aştî û hesabanê sîyasîyan, hetî yewbînî ra bawer nêkenê."
Demîrtaşî vurnayîşê paradîgma ke serekê PKKyî Abdullah Ocalanî vengdayîşê xo de behs kerdbi ser va:
"Dewleta Komara Tirkîya, dewleta Kurdan a zî.
Ganî ez vatişanê Tirkanê ke vanê, 'Ma wina nîyo?' yan zî Kurdanê ke vanê, 'No mimkun nîyo' ser vinderî û nînan ser tay vatişan îlawe bikerî.
Kurdî zî bi nasnameyê xo, ziwanê xo, kulturê xo do bibê welatîyê asas ê yewin ê Komara Tirkîya, wayîrê aye bê.
Sey demanê verênan, îcab nêkeno ziwanê xo, nasnameyê xo binimnê,, bê ters û sey Kurd, bi Kurdmendişî do dewleta Komara Tirkîya rê entegre bibê.
Ganî dewlet zî êdî îdeolojîya fermî ya yewparêzîye temamî bido hetêk û hemê beranê xo Kurdan rê temamî akero; hurmet ziwanê Kurdan, kulturê înan, nasnameyê înan qebûl biko.
