Kanalê CNN yê xeberan vizêr (Pancşeme, 30.01.2025) keyepelê xo yê resmî de pare kerd ke yew tabloya newe ya resimkarê holendayî Vincent van Gogh (1853-1890) dîyaya. Na tablo yew muzayedaya eşkere de wîlayetê Mînnesota yê Amerîka de ameya rotene.
Yew grûba cigêrayoxan ke hetê şîrketa cigêrayîşê hunerî LMIyî ra seba cîgêrayîşanê na tablo ser ameyê weçînayene, badê tehlîlê kaxizê na tablo, renganê boyaxe û xusûsîyetanê bînan û badê çar serran tesdîq kerd ke na tablo hetê Van Goghî ra ameya viraştene.
Nê pisporan cigêrayîşê xo de reyna eşkera kerd ke mumkin o ke na tablo serra 1889î de ameya viraştene ke Van Gogh o wext de yew nêweşxaneyê psîkîyatrî yê başûrê Fransa de bi.
Girdîya na tablo mabênê 45.7 û 41.9 santîmetreyan a, û goşeyê cêrî yê hetê raştî de "Êlîmar" ameyo nuştene.
Na tablo de yew masegiro rîhsipî aseno ke pîpo antceno û tora xo top keno. Mumkin o ke Van Goghî na tabloya xo bingeyê tesîrê resimkarê danîmarkî Michael Ancherî (1849-1927) de viraşta, ke bi antişê resimanê masegiran namdar bi.
Cigêrayoxan yew telê porî zî kaxizê na tablo ser dîyo. Caxo ke badê testê DNAyî aseno ke no telê porî yê yew camêrdî yo, nêamo tesdîqkerdene ke no telê porî yê Van Goghî yan yê yew kesê nêzdîyê ey o, çîyo ke tesdîq keno ke na tablo ya Van Goghî ya, terzê aye yo.
Van Goghî cuya xo de nêzdîyê 900 tabloyî viraştê, mumkin o ke o bi nêweşîya psîkîyatrî ya "têkşîyayîşê kesayetîya dicemserî" nêweş bibi, labelê heta nika zî nêweşîya Van Goghî bi temamî nêameya tesbîtkerdene.
Cigêrayoxê Merkezê Tibbî yê Ûnîversîteya Groningenî ya Hollanda serra 2020î de îlan kerd, "Mumkin o ke Van Gogh seba terkkerdeşê alkolî dekewtbi nêweşîya psîkîyatrî." No zî badê ke ey serra 1888î de goşê xo birnabi, heta nika zî sebebê cinê yeno zanayene ke çira ey goşê xo birnabi.
Van Gogh serra 1890î de emrê xo yê 37 serrîye de bi tufingî cuya xo qedênaya.
