Tirkîya û Bakurê Kurdistanî de 15 hezar mamostayê neweyî yenê tayînkerdiş la Wezaretê Perwerdeyî 6 kontenjanî dersê ziwanê Kurdkî rê veçînayê. Semedê Zazakî zî tena yew kontejan ame dayîş.
Wezaretê Perwerdeyî yê Tirkîya ewro keyepelê xo yê resmî ser o kontenjanê 15 hezar mamostayan ke do dibîstanan de bêrê tayînkerdiş vila kerdî.
5 kontenjanî lehçea Kurmanckî rê û 1 zî zazakî (Kirmanckî) rê ameyê veçînayene.
Serokkomarê Tirkîya Recep Tayyip Erdoganî 15ê Nîsana 2025î îlan kerdibi ke do 10 hezarê înan Akademîya Perwerdeyê Millî de û 15 hezarî zî dibîstanan de pêroyî 25 hezar mamostayê neweyî Tirkîya û Bakurê Kurdistanî de bêrê tayînkerdiş.
Goreyê a lîsteye tenya 6 kontenjanî Kurdkî rê ameyê veçînayene û 5 înan ra seba Kurmanckî û 1 înan ra zî seba Zazakî yo.
No demêk de yo ke eynî lîsteya Wezaretê Perwerdeyî ya Tirkîya de seba Îngilîzkî 757, seba Tirkî 623, seba Erebkî 51, seba Almankî 23, seba Rûskî 9 û seba Fariskî zî yew kontenjan ameyo veçînayene.
Goreyê zanayîşan heta nika 4 zanîngehanê Bakurê Kurdistanî yê lîsansî ra zêdeyê 2 hezar mamostayê Kurdkî vejîyayê.
Heta nika hemeyê dibîstananê seranserê Bakurê Kurdistanî û Tirkîya de tenya 124 mamostayê Kurdkî ameyê wezifedarkerdiş.
Tirkîya de serra 2012î ra dibîstananê merkezîyan de dersê Kurdkî sey dersanê vîjyayeyan yenê dayîş û mamostayê Kurdkî dibîstanan de binê banê dersê Fek û Ziwananê Ganîyan de kuwenê dersanê Kurmanckî û Zazakî.
Goreyê amaranê Wezaretê Perwerdeyî yê Tirkîya serra vîyartî 31 hezar û 199 wendekaran dersê Kurmanckî û 3 hezar û 805 gedeyan zî dersê Kirmanckî (Zazakî) weçînaybi.
2024î de pêroyî de 35 hezar û 4 wendekaran dersê Kurdkî weçînaybi.
Goreyê amaranê serranê vîyarteyan amara weçînayîşê dersanê vîjîyayeyan serr bi serr zêde bena la vera aye de sey lazimbîyayîşî mamostayê Kurdkî nêyenê tayînkerdiş.