Her çiqas destpêk û werteyê serra 2023î de hetê edebîyatî ra eserê neweyî çîne bê zî peynîya serre de xeylê kitabê Zazakî ameyî weşanayîş.
Cayê keyfweşîyo ke tena aşma kanûne de hewt hebî kitabê şîîran ê bi Zazakî ameyî çapkerdiş.
Xeylê nuştoxanê Zazakî verê xo dayo şîîran û bi Zazakî humara kitabanê şîîran zêdîyaya.
Kitabê şîîran ê ke aşma kanûne de vejîyaye
Sebr - Bedrîye Topaç (Vate)
Warway - Enwer Yılmaz (Nas)
Azad - Îbrahîm Xaşxaşê (Vate)
Binefş - Bedrîye Topaç (Vate)
Çîkê Vîstekî - Osman Aytar (Vate)
Dijeyê Pistanan - Umer Barasi (Vate)
Vila Koyûn - Cuma Ali Karaman (Nûbihar)
Bi Zazakî yewna kitabê şîîran ameyo vilakerdiş.
Koordînatorê Weşanê Pêroyî yê Zazakî Newsî Enwer Yılmaz o ke bi xo zî kitabê şîîran o bi nameyê "WARWAY" nuşto bi Zazakî derheqê edebîyatê şîîran de vatbi;
”Raşta ci ziwanê ma zaf rindek o. Ziwanê ma her çiqas erey amo nuştiş, edebîyatê ma erey dest pêkerdo zî ziwanêko zaf dewlemend, xorîn û estetîk o. Bi ziwanê ma her tewirê edebîyatî beno û ziwanê ma tu ziwanêkî ra cêr nîyo. Merdim eşkeno heme hîsanê xo bi ziwanê xo zî binuso. Ziwanê ma semedê her tewir edebîyatî bes o ke ma pê binusê. Ma şarêko dejaye, birîndar ê. Ayra ma zaf dekerde yê. Edebîyat, îmkan dano ke ma dejanê xo, birînanê xo û neheqîya ke ma rê ameya kerdiş binusê, bimojnê. Xora eke ma dej, vîr û vînayîş û birînanê xo neqlê edebîyatî bikê ne murekeb, ne qelemî ne kaxizî ma rê bese kenê. Ma hendê miletêko dekerde, dejaye û birîndar ê. Her çiqas welatê ma de ziwanê ma roje bi roje kêmî yeno qiseykerdiş zî hetê edebîyatî û medya dîjîtale ra xebatê neweyî estê, benê û ercayê yê."