Ozcan Yılmaz
Ma ke hona domonî bîme kokimû minete kerdene vatene “ya Haq, ya Xizir bê ciwanmerdîye, çengê wele/here ma de, ma verê destû meke”.
Mineta tayîne qewil bîye. Eve zonê xo, adet û torê xo, îtîqat û îqrarê xo weşîya xo ramite, hardê xo de wertê qomê xo de merdî, şî xeleşîyayî.
Tayê kî mendî. Zon, rayê, îtîqat, îqrar verê çimûnê nînû de je vora verê tîjî viloşîyayî ro şî.
Dima kî problemê teyna mendîsî pêda bî. Dewî kerdî tol/veng, gencî şî Avrûpa zafe ma û pî/ebeveynî binê bonê xo de tek û teyna mendî!
Bado kî kultur û tarzê suke/şaristanî vecîya. Ye tayîne domonî est ê faqat nêşîkîne ma û pîyê xo rê wayîrenî bikere! Ya kar û gure ra firsat nêvînene, ya kî tarzê cuyayîsê/heyatê suke ra has kene û ma û pîyê xo rê wayîr nêvecîne!
Tabî kokimî kî je virenî nêyê. Virende ra dewû de gureyene, mabenê domon û tornûnê xo de bî. Wayîrê ca û qiymet bî. Hal û waxtê xo, aqil û sihatê xo rind bî. Nika ne gureyene, ne kesî vînene, ne kes înû vîneno. Bê ca û qiymet ê. Bêkar û bêkes rew bene pîr û serwerde/xêx û gej (bunak)!
Suke de endî kes rehetê xo, hûzûrê xo xirabê nêkeno. Kesê ke bî kokim beno keno ve bonê hûzûrî/yûrdê kokimû. Kal û kokimî endî ya binê bonê xo de tek û teyna yê, ya kî bonê hûzûrî der ê!
Vane Mamekîye de ju mordemek beno kokim. Hetê fîzîkî ra rind beno ama hetê ruh û aqilî ra halê xo tene senik hassas beno, yanî beno pîr û serwerde. Domonê neyî kes nêşîkîno ci rê wayîrenî bikero. Bene kene ve bonê kokimû!
Tabî kokim o feqîr nêzoneno ke yûrd der o. O vano belkîya hona çê lazê xo Mîrzalî der o. Rozê ju dewizê xo sono ve dîyarê nê kokimî. Hal û demê jubînî pers kene, xoş-beş kene, qeseyî kene.
Kokim zîyaretçîyê xo ra vano “Haqê xo est o, çê Mîrzalîyê ma pak û delalî yo, kulêlik o”!
Meymanê kokimî ci ra vano “no bom o, bom o, sene çê Mîrzalî yo? Çê Mîrzalî sarê to boro! Ti yûrd der a, yûrd”!
Kokim vano “hey wax, coka wo vato ma û pî 7 domonû kene pîl ama 7 domonî ju maye rê, pî rê wayîr nêvecîne”! Vane ax û wax keno, a roze ra dime kî vilê xo beno çewt, poştîya şîkîna. Dest û payê xo na dîna ra onceno. Tayê rozû ra dima kî tek û teyna oda xo de gineno piro mireno!
Kam çi zoneno eve çi ejat nê domonê xo kerdî pîl, eve çi ejat solixê xo yo peyen da?
Ama suzê domonû kî nêyo, dîna vurîna, sukû de tarz û kulturodê newe vecîyo. Çiqaşî ke zor bo, gune însan raştîye û realîte qewil bikero. Tarz û munasebet ê virenî endî darîne we.
Seke saîrî vato, “na wa ke yena zilomet a tenekûn a, kes kesî nêhesneno”.
Vane bêtere ra bêtere esta! Hala vindere naye ra dime çi yeno ma ser de?