Partîya Şarî ya Komarî (CHP) qerar da ke mîyanê 3 aşman de namzedê xo yê serokkomarîye eşkera bikero.
Goreyê wextê qanunî do weçînayîşê Serokkomarîya Tirkîya serra 2028î de bêro kerdene labelê mumkun o ke weçînayîşê verêwext bêro kerdiş.
Serekê Pêroyî yê CHPyî Ozgur Ozelî vizêr kombîyayîşê parlamentoyê partîya xo de xeber da ke ê do namzedê xo yê serokkomarîye eşkera bikerê û roja yewin a prosesê dîyarkerdişê namzedê serokkomarîye de yê.
Meclisa Partîye ya CHPyî do seba destpêkerdişê roja weçînayîşanê verênan yê dîyarkerdişê namzedê serokkomatîye kom bibo û yew qerar bido.
Qerarê Meclisa Partîye ra dima do 81 rêxistinanê bajaran û 973 qezayan de sindoqî bêrê ronayîş û seba namzedê serokkomarîye do yew mîlyon û 600 hezar endamê partîye rey bidê.
CHP wazena prosesê dîyarkerdişê namzedê serokkomarîye 3 aşman de biqedîno.
CHP do seba dîyarkerdişê namzedê serokkomarîye hetanê cîya-cîyayanê komelî û sazîyanê sivîlan reyde pêvînayîşan bikero.
Labelê zereyê CHPyî de namzedê tewr bihêzî Serekê Partîye Ozgur Ozel, Serekê Şaredarîya Bajarê Girdî ya Îstanbulî Ekrem Îmamoglu û Serekê Şaredarîya Bajarê Girdî ya Anqara Mansur Yavaş ê.
