Hemserekê Partîya DEMî Tuncer Bakirhanî va "Şaredarîya Akdenîzî ser o ronayîşê qeyyûmî vera demokrasî derbeyêko eşkera yo."
Dima ra ke Hemşaredarê Şaredarîya Akdenîzî Hoşyar Sariyildiz û Nurîye Aslan ameyî tepiştiş, cayê înan de qeyyûm ame tayînkerdiş.
Wezaretê Karanê Zereyî yê Tirkîya qeymeqamê qezaya Akdenîzî ya Mersînî Zeyît Şenerî sey qeyyûmî tayînê Şaredarîya Akdenîzî kerd.
"Zalimî û zordarî do vîndî bikê"
Hemserekê Partîya DEMî Tuncer Bakirhanî tayînkerdişê qeyyûmî ser o yew beyanat vila kerd û va:
"Hemşaredarê Şaredarîya Akdenîzî û endamê meclisê ma çarçewaya operasyonanê qirkerdişê sîyasî de ameyî tepiştiş.
Cayê Şaredarîya Akdenîzî ya ke bi îradeya şarê Akdenîzî ameybî weçînayene de qeyyûm ame ronayene.
Şaredarîya Akdenîzî ser o tayînkerdişê qeyyûmî vera demokrasî derbeyêko eşkera yo.
Vera hêvîya pêkerdişê şaran suîqestêko sîyasî yo. Ma nê çî red kenê.
Yew het ra aştî yena qalîkerdene, hetêko bîn ra zî destronayîşê îradeya şaran karê aqilî nîyo.
Ma vengê xo berz kenê ke demêko kilm de nê vindetişê aqilî ra dest bêro antene.
Ma sozê xo newe kenê ke ma do vera zordarîya qeyûman, derbeyê ke vera demokrasî yê û dişmenîya Kurdan têkoşînê xo yê demokratîkî berz bikê.
Zalimî û zordarî do vîndî bikê, şar do ser bikewo!"
