Hamnanî de seba hewayê germî bedenê ma tim awe vîndî keno û seba naye ma ganî hîna zaf awe bişimî. La wextê ameyîşê payîzî de, seba ke hewa honik beno, hîsê teyşaniye kêm beno û zafê merdiman şimiştîşê awe kêmî kenê. Labelê, sey her demsalî, payîz de zî şimitişê awe seba bedenê ma zaf muhîm o. Kêmîya awe, bi taybetî ser sistemê hezmkerdişî tesîrê negatîfê cidî eşkeno virazo.
Ma payîz de muhîmîya şimitişê awe û problemê mîdeyî ser o Doktor Canan Kılıçe dir qisê kerd.
Canan Kiliçe vana “Eke ma payîz de zî awe nêşime yan zî ma goreyê hamnanî zêder kêm bike ma do hetê pîzeyî ra zehmetîyan biance. Ganî ma zimistan zî tewr kêmî rojane 1 lître awe bişime.”
Canan kiliçe payîz de şimitişê awe ser o ma rê nê çîyî vatî;
- Şimitişê awa kême benno problemê pîzeyî. Wexto ke aşmanê payîzî de ma şimitişê awe kêmî kenê, sistemê hezimkerdişî tira zirar vîneno. Awe, prosesê hezimkerdişê pîzeyî rê ardim kena û merdim pê werdano ke weno rehet helîneno. Kêmîya awe eşkena ahengê asîdê pîzeyî zehmet bikero û bibo sebebê problemanê sey veşayîşê mîdeyî û refluksî. Wexto ke awe bes nêgêrîyena, hereketê rîyî hêdî benê û problemê sey qebzî eşkenê vejîyê werte.
- Nêşimiştişî awe payîz de eşkeno fonksîyonanê mîdeyî hêdî bikero û bibo sebebê nêşimiştişî. Wexto ke beden bes awe nêgêno, werdî mîde de demêko dergêr manenê û no zî beno sebebê nîşananê nêşimiştişî yê zey nepixîyayîşî. Bi taybetî wexto ke werdî giran û bi rûn yenê werdene, nê nîşanî eşkenê hîna zêde bibê.
- Faydeyê Pêroyî yê şimitişê awe tenya seba sistemo hezimkerdişî nê, eynî wext de seba xebetnayîşê pêroyî yê bedenî zî wayîrê rolêko muhîm o. Germîya bedenî rast kena, ardim kena ke toksînî vejîyê û verdena ke post weş bimano. Aşmanê payîzî de seba tesîrê hewayê honikî ra dest şimitişê awe ra veradayîş, eşkeno nê fonksîyonanê ganîyan ê bedenî asteng bikero.
- Payîz de vîrardoxanê Awe Bişuxulne: Şima eşkenê telefonê xo ser alarmanê ke do şimitişê awe bîyarê vîrê şima virazê. Çay û Çayanê vaşî Bişimê: Eger şimitişê awe zehmet yeno, şima eşkenê bi şimitişê çayanê vaşî yê bêşeker îhtîyacê xo yê awe temîn bikerê.
Netîce
Sey her demsalî, payîzî de zî şimitişê awe lazim o, hetê weşîya mîdeyî û hemsengîya pêroyî ya bedenî ra wayîrê muhîmîyêko pîl o. Heta ke şima teyşan nêbê zî, cuya xo ya rojane de tim awe bişimêne. Seba ke Bedenê şima bi hawayêko weş bixebitîyo, her demsalî de, bi taybetî zî payîzî de dîqet bikerê ke bi nîzanî awe bişimê.
Bîlhuda Dogan Çît /Zazakî News