Şaredarîya Amedî ya Şaristanê Girdî, 4 cayê bajarî de Çeşmeyê Îkramî ronaye û hefteyê mîyan de her roje 2 hezar kesan rê dest bi vilakerdişê şorbaya bêpereye kerd.
Serekîya Daîreya Xizmetanê Sosyalan, vera nexweşxaneyanê bajarî de Çeşmeyê Îkramî rona û şorbaya germe şarî rê îkram kena.
Şorbaya ke bi hawayêko hijyenîk saetanê serê sibayî de aşxaneyê Serekîya Daîreya Xizmetanê Sosyalan de yena hazirkerdiş, vera Polîklînîkê Nexweşxaneyanê Unîversîteya Dîcle, Nexweşxaneyê Perwerde û Cigêrayîşî yê Gazî Yaşargîlî, Nexweşxaneyê Dewlete yê Selahedîn Eyûbî û Nexweşxaneyê Zayîş û Domanan de Çeşmeyê Îkramî rona û mîyanê hewteyî de her roje resnena şarî.
'Ma her roje 2 hezar kesan rê şorba îkram kenê'
Sereka Daîreya Xizmetanê Sosyalan Serap Yildirim dîyar kerd ke ê seba xizmetê şarî xebitîyenê û va: "Ma Çeşmeyênê Îkramî de ke ma hamnanî de sey servîsê şerbetê lîmonî şuxulnayêne, bi ameyîşê aşmanê zimistanî û serdîya hewayî ma dest bi îkramê şorba kerd. Ma her roje 2 hezar kesan rê şorba îkram kenê."
'Ma zaf acibna’
Nilgun Ozsoy ke şarî ra yew a, va ke seba ke nêweşê ci est o ameya bajar û wina dewam kerd: "Ma Sakarya ra ameyî, Unîversîteya Dîcle de nêweşê ma est o. Ma teber ra Çeşmeyê îkramî dî, eleqeyê ma ant. Înan ma rê şorba îkram kerde û ma zaf ecibna. Ez do na proje sey nimûne bera Sakarya. Ma Şaredarîya Amedî ya Bajarê Girdî rê sipas kenê."
'Ma DBB’ rê sipas kenê'
Personelê Unîversîteya Dîcle Ferît Mendaşî zî dîyar kerd ke Çeşmeyê Îkramî înan rê asanî temîn kena û wina qisey kerd: "Wexto ke ma yenê kar û wexto ke ma nobetî ra vejîyenê, ma tîya de şorba şimenê, ma rê weş beno. Seba xizmetanê ci ma Şaredarîya Amedî ya Bajarê Girdî rê sipas kenê."
Şaredarîya Bajarê Girdî, aşmanê zimistanî de do dewam biko Çeşmeyê Îkramî ra şorbaya germe şarî rê îkram biko.
