Dîyarbekir de karkerê ke firinan de xebitîyenê, semedê kêmkerdişê saetanê xebate, îzin û sîgortaya xo 15ê Êlule roja yewşeme kar verdanê.
Dîyarbekir de Komîsyonê Karkeranê Firine yê Sendîkaya Gıda-İş ke girêdayeyê DİSKî ya, derheqê şertanê xebata xo de yew beyanat da.
'Ma karkerê ke bêqeyd xebitîyenê û îstîsmar benê'
Vervatoxê Komîsyonî Adem Demîrî beyanat wend û va ke, karkerê firine ke binê şertanê zor de nanê şarwanan virazenê, sey karkerê bêqeyd xebitîyenê.
Demîrî va: "Ma karkerê ke bi serran fırınan de sistemê koletiye reyde 14 saete xebitiyenê, heqê tatîlî destê ma ra ameyo girewtiş, bêsigorta û bêqeyd xebitiyenê û îstîsmar benê. Wa firinê ke karkerê bêsigorta xebetnenê bêrê kontrolkerdiş, ceza bideyo înan. Ma semedê nê heqanê xo 15ê êlule roja yewşeme kar verdanê"
Waştişê karkeranê firinan wîna yo;
-Saetê ma yê xebate hefteyêk de 45 saetan ra zêde nêbo.
-Yew roja hefteyî sey roja tatilî bêro tayînkerdiş. Rojanê xususîyan de (Roşanan, rojanê şîn ûsn.) heqê îzinî ma rê bêro dayiş. Reyna serre de tewr tay 24 roji heqêîzînê serre ma rê bêro dayiş.
-Firinê ke karkeran bêsigorta xebitnenê wa bêrê kontrolkerdiş û ceza bidîyo înan. Hemê embazê ma yê ke bêsigorta xebitîyenê wa qeydê sigortaya înan bêro viraştiş."
Enwer Yılmaz