Enwer Yılmaz
Dîyarbekir de yew dewayêka ecêbe esta, wazena şima rê behsê ci bikî û fikrê xo vajî.
Mesela wîna ya;
Tirkiya de şaristananê cîya-cîyayan ra wayîrê rutbeyanê berzan ê dadgerîye zî tede, zaf karmendê îdareyî û memurê dewlete pereyê xo berdî dayê zerdroşêk. Semedo ke hîna zêde pere qezenc bikê verê xo dayê zerdroşan. Diyarbekir de serra 2020 de zaf karmendê dewlete, zafê xo sawcî û hekîman ra vajîya ke "Ma pereyanê şima xebetnenî, ma do şima rê pereyo ke zaf zêdeyê faîzê bankayan o bidî" nê karmendê dewlete bereyê xo dayê Zerya Kuyumculuk.
La rojêk pêhesîya ke Zerya Koyumculuk îflas kerdo, wayîrê zerdxaneyî remayê. Badê wayîrî ameyî tepştiş, nika hepisxane de yê û dewa dewam kena. La pereyî meydan de çîn ê!
Merdim fikrîyeno xo bi xo. Hendê pereyî sawcî û hekîman de çi gêrenê? Înan çi ca ra nê pereyî ardê. Mîyanê dosyaya dewa de nê persî qey çîn ê?
Ma fehm kenê ke nê sawcî û hekîmî semedo ke pereyanê xo bankayan de nêtepişî, semedo ke wa çew pênêheso hendê pereyê înan estê dayê zerdroşêk. Zerdroş zî sey tefekar o. Qeyd çîno çîke çîno!
Gelo înan hendê pereyî senî qezenc kerdê?
Ma zanê ke Tirkîya de eke pereyê to zaf ê, paştîya to de hêzê dewlete yan sîyasî estê û ti sûcêk bikî zî ti nêkewenî hepisxane û ceza nêgênê.
Goreyê mi ê sawcîyê ke pereyê xo daybî zerdroşî pêro sûcdaran ra pereyî girewtê.
Xora çewî înan ra nêva şima nê pereyî çi ca ra ardê? Ayê ke ganî bipersê zî wayîrê pereyêko zaf bî û wertaxê înan bî xora.
Halbukî gere ê sawcî û hekîman ra biamêne perskerd. Çira pereyê xo dayê zerdroşêk?
Nê rojanê peyênan de Dilan Polat û Engin Polat êyê ke bi ispakerdişê belgeyan sextekarî kerdbî 10 aşman ra dima hepisxane ra vejîyaybî.
Eke yew feqîr nê sûcî bikerdêne bi serran hepisxane de mendêne. Labeleê semedo ke zaf pereyê Polatan estbî zere de tay mendê. Xora înan malo ke dewlete dest ronabi ser zî peyser girewt. Hem bîyê pank hem zî malê xo peyser girewtî.
Eke pereyê to estê no welat de ti sûcdar nêbenê û eke paştîya to de partîya îqtîdarî esta xora axa zî ti yî paşa zî ti yî.
Tabî welato ke tede hûqûq, ehlaq û wicdan esto de nê çîyî nêbenê. La Tirkîya de... Bi serran Kemalîstî Tirkîya îdare kerdê, şarî va qey Misilmanî yenê edelet û ehlaq yeno welat... La nika Tirkîya dewrê Kemalîstan ra wetêr a.
Êyê ke burokrasî de yê zafê xo bêusulî kenê. Xora hûqûq hema vaje pêro destê partîya îqtîdarî û wertaxanê ey de yo. Hûqûq ê bi xo yê. Qanûn ê bi xo yê. Keyfê înan senî waşt wîna kenê.
Nika dewaya Narîn Gürana 8 serrî ke Dîyarbekir de bibî vindî û badê 19 rojan cesedê aye amebi vînayîş esta. 24 kesî tepişte yê û ez hêvî nêkena do dewa bi zelalî nêtîce bibo.
Hêzê dewlete û pereyo ke keyeyê Güranan de esto do şîyayîşê dewa bewlî biko. Çimkî her kes zano ke raştîyî zî sey Narîne nika bîne erdî de yê. Eke hûqûq bibîyêne ma nêeşkêne wîna vaje, la hûqûq ney hêz û pere qerar dano.
De bê welatêko wîna de kar bike û bicûye! Onca zî raştî rojêk vejyena meydan û kesê ke nêheq, zulumker, dizd û bêehlaq ê peynîya peynî telef benê.