Suzan Vejan Tatlı
Nişka ve ra vinderte û çimî çarnayî derûdorî ra. Çi wexto ke rayîr ra ya, ça ra ameya, kamcin hetî ra şina, qet nêzanayêne.
Ser o hende wext vîyartbî ke…
La nika? Nika zanayêne ke ganî kam hetî ra dewam bika şêra, yan ney?
Bi hewayêko bêmana fikirîyaye…
Fikirîyayîşêko bêhîs, fikirîyayîşêko bêhêvî…
Çimî çarna ke cayêkî bivîna û ronişa. Çend game ra pey nêzdîyê banqêk bîye.
Barê xo yo giran, barê xo yo hezar serran! Banqî ser o rona û ronişte.
Piştîya xo…
La a piştîya xo ya ke bi serrano binê ê barî de helesnayo, kerdo pûç…
Wina hêdî hêdî piştîya xo şanaye banqî ra sereyê xo hewana hetê asmênî ra û bi çimanê padayeyan nefesêko kûr girewt.
Goşan de tena vengê pelanê huşkan, vengê xoverdayîşê befrînan…
Hewayêko cemedin ame gina rîyê aye yê vindîbîyayeyî ro.
Gelo şima qet rîyê xo vindî kerdo yan zî şima çirey gêrayê rîyê xo yo vîndîbîyaye?
Rîyê merdimî zî ge-ge vîndî beno qey şima pê nêzanê?
Eke wina nêbayêne, merdim eşkayêne ke pê çimanê akerdeyan xo nêvîno.
La hema çi beno wa bibo, vindîbîyayîş weş o!
Vindîbîyayîş weş o helbet, la eke merdim peynîye de bieşko ke bigêyro xo, xo bivîno, la bi çimanê akerdeyan…
Tewr muhîm zî bieşko ke xo bi xo, xo pênas biko.
Xo bi xo pênaskerdiş; hayî bi xo bîyîş o ke hişyarîya tewr pîle zî a ya xora.
Newe ra dejê piştîya xo ke hîs kerd, dest eşt piştîya xo û giştanê xo yo barî dejanê xo ser o berd û ard.
A game, hema a game çilkêke awe ginaye orteyê çimanê ci ro. Bi destanê xo yê dejdaran, wina bi giranî çareyê xo a çilka awe ra pak kerd û bi vengêko nizm “çarenus!” va.
Çi bî çarenus raşta?
Gelo raşta zî merdim goreyê çarenusê xo herikîyayêne cuye ro yan bi destanê xo yê afirnayoxan kinitêne cuya xo.
Destê xo akerdî, ewnîyaye destanê xo yê qeleşîyayan ra.
Her qelaşî de dejê vîyarteyî, her qelaşî de dejê poşmanîya nêceribnayîşî…
Xalxalokêke ameye nîyaye destanî mîyane ro, lew na înan ra, bi peşmirîyayîşêko dejin “bes o” va, “bes o!” firay û şîye…
“Heta tîya!” va aye zî xo bi xo, bi vengêko nizm, la bi xo bawer…
Qedîyabî yan hema newe dest pêkerdêne qet nêzanayêne.
Xora kam ça ra pê zano ke qedîyayîş ça de dest pêkeno yan zî destpêkerdiş ça de qedîyeno.
La çîyo ke tewr muhîm qerardayîş o ez vana qey.
Qerardayîş destpêkê qedênayîşî yo, yan zî bi xo destpêk o.
Her qedîyayîş newe ra destpêkerdiş o xora, newe ra rayîrkewtiş…
La nika tena hîskerdişê na sivikîye bes bîye ci rê.
Çi hîsêko ereymende!
Çi hîsêko ereymende!
La wa bo, arqilîyayîşê nê hîsî besê her çîyî bî.
Peşmirîyaye û warişte.
Warişte ke bikewo rayîr û biceribno.
Xora rayîrê serkewtişî zî binkewtişî zî ceribnayîşî ra vîyareno, zanayêne.
La nê her di zî qet xemê aye de nêbîyî na game.
Xora goreyê çi serkewtiş? Yan zî goreyê kamî binkewtiş?
Pêrodayîşê tewr pîlî êyê ke xo reyde yenê kerdiş ê nîyê qey.
Nika ci rê tena ceribnayîş hewce bî, tena ceribnayîş…
Çunke do tena ceribnayîşî lêlê ciwîyayîşê xo de ci rê rayîrê zelalkerdene biakerdêne.
La tena merdim gere bieşko ke xo ra biperso vajo ez kam a?
No pers beno ke vernîya cewabê to nêdo la do vernîya persanê cîya cîyayan akero to rê.
