Haydar Diljen do no hewte (19.10.2024) Sêwregi de yew seminer bido.
Sêwregi de bi nameyê "Kursîyê Şarî yê Sêwregi" (Siverek Halk Kürsüsü) yew înîsîyatîfo sîwîl xebatanê huner, kultur û ziwanî keno. Bi çarçoweya nê xebatan de Meymanê nê hewteyî nuştox, cigêrayox û endamê Grûba Xebate ya Vateyî Haydar Diljen o.
Haydar Diljen do têkilîya averşîyayişê ziwanê dayike û perwerdeyî de tay melûmatan bido û tecrubeyê Swêdî ra zî behs bikero.
Semîner do roja yewşemeyî (19.10.2024) saete 14.00 de dest pêbiko.
"Ma qayîlê potansîyelê Sêwregi vejê meydan"
Derheqê vernameyî û xebatanê bînan de, kursîyê Şarî yê Sêwregi ra, M. Îlyas Gîzlîgolî Zazakî Newsî rê wina va; "Ma sey şarê Sêwregi wazenê ke, bajarê ma bibo merkezê kultur, huner û edebîyatî. Coka ma çend embazî ameyî têhet û ma dest bi xebatan kerd. Amancê ma no yo ke; ma potansîyelê Sêwregi vejê meydan û şarê xo nê potansîyelî ra xeberdar bikerê. No hewte zî ma do muhîmîya ziwanê dayike ser o yew vername virazê. Meymanê ma Haydar Diljen na mesela de wahîrê tecrubeyênê xeylê muhîman o. Çunke ey Swêd de nêzdîyê 40 serre bi ziwanê kurdî (kurmancî/zazakî) derse daya, kitabî amade kerdê û xora endamê Grûba Xebate ya Vateyî yo. Ma bi wesîleyê şima şarê eleqedaran dawetê nê vernameyê biqîmetî kenê. Wa kêmî nêmanê."
Ca: Molla Veli Hanı
Organîzator: Kursîyê Şarî yê Sêwregi
Tarîx: 19.10.2024
Saete: 14.00
Zazakî News / Enwer Yılmaz
