ZAZAKÎ NEWS - LiteraKurd Keyeyê Edebîyatî, do 6ê Nîsana 2025î de Sûra Amedî de berê xo heskeroxanê edebîyatî rê akero.
Na dezgeha newîye do bi amancê averşîyayîşê ziwan û edebîyatê Kurdkî dest bi xebatanê xo bikero.
Bi munasebetê akerdişî do akademîsyen Serdar Şengul û nuştox Mehmet Dêcle bi bernameyê "Dewrê Modernî de Kurd, Bajar û Edebîyat"î xêrameyîşê mêmanan bikerê û yew panelî de qisey bikerê.
Badê bernameyî zî do koktêylêk bêro organîzekerdiş.
LiteraKurd Keyeyê Edebîyatî dîyar kerd ke na xebate encamê fikir û kedê zaf nuştoxan û roşinvîranê Kurdan a, seba ke bibo merkezê ziwan û edebîyatê Kurdkî ameya awankerdiş.
Goreyê vatişê LiteraKurd Keyeyê Edebîyatî, na dezgeh do hewl bido ke edebîyatê Kurdkî yo ke bi sînoranê sîyasî û zimanî ra yewbînan ra cîya bîyo, bîyaro têhet û vîrê Kurdkî yo ke bi zaf sebeban vila bîyo, bi tevgerêka pêroyî bîyaro têhet.
Litera Kurdî akerdişê xo ser peyamêk vila kerd û va:
"Seke yeno zanayîş, keyeyê edebîyatî bajaranê dinya û neteweyan de rolêko sereke kay kenê.
LiteraKurd zî bi nê amancî do rengê Kurdkî bajarî de bikero dewlemend û keyberanê bajarî edebîyatanê dinya rê akero.
Ancîya do nuştoxan û wendoxanê Kurdkî bîyaro têhet û bi atolye û kursanê nuştişî edebîyatê modernî aver bero. LiteraKurd do nuştoxanê Kurdan û nuştoxanê dinya bikero mêman û înan û wendoxan bîyaro têhet.
Hemeyê heskeroxanê ziwan û edebîyatê Kurdkî yenê dawetkerdene ke 6ê Nîsanî de beşdarê na çalakîya akerdişî bibê."
