Kovara Vateyî ke bi safî kirmanckî (Zazakî) hadre bena û her hîrê aşman ra yew vejîyena, bi hûmara xo ya 76. vejîya verê wendoxanê xo.
Na hûmare de J. Îsan Espar, Menekşe Akalin, Dr. M. Malmisanij, Îdrîs Yazar, Canê Dilo, Ali Öz, Îsmet Bor, Mem Keleş, Resul Yıldırım û Mistefa Gomayij bi nuşte, hîkaye, cigêrayîş û şîîranê xo ca gênê.
Na hûmara kovare zî sey hûmaranê verênan dekerde ya û nuşteyê muhînî tede ca gênê.
Weşanxaneyê Vateyî ke bi taybetî Kirmanckî (Zazakî) ser o xebetîyeno û heta nika bi seyan kitabî û 75 hûmarê Kovara Vateyî çap kerdî, humara 76. ya Kovara Vateyî weşana.
Kovara ke hîrê aşman ra hewêk vejîyena, na hûmare ci zî sey ê bînan bi babetanê muhîman û zaf renginan dekerde ya.
Keyepelê Vateyî de beşê "wendoxan rê" ameyo parekerdiş û ma şima dir parê kenê. Beşê "wendoxan rê" yê Kovara Vateyî cêr de yo.
Wendoxê delalî,
Yew hûmara newa ya kovara Vateyî şima dest de ya. Seke şima zanê emser serra vîst û şeşin a ke kovara Vateyî weşanîyêna. Gama ke serrî çimanê ma ver ra sey awe herikîyêne, merdim ge-ge wazeno xo ra pey biewnîyo. Ma zî wina kerd, ma derheqê muhtewa û nuştoxanê 75 hûmaranê kovare Vateyî de tayê statîstîkî kom kerdê ke pêşkêşê şima bikê. Ma wazenê hûmara nuştoxan ra dest pêbikê. Melumatê hûmara nuştoxan hîrê perîyodanê cîyayan ser o amade bîyo.
Hûmaranê 1–33 de hûmara nuştoxan 155 a. Hûmaranê 1–50 de na hûmare resena 236 nuştoxan û heme 75 hûmaran de eserê 308 nuştoxan weşanîyayê. Nê 308 nuştoxan ra 38 hebî cinî yê. 35 nuşteyî zî ameyî açarnayene. Mabênê hûmaranê 33–50 de yanî 17 hûmaran de 81 nuştoxî zîyade bîya. Nê 25 hûmaranê peyênan de 68 kesan reya verêne Vateyî rê nuşto.
Wendoxê delalî,
Ma wazenê hûmara çend babetanê nuşteyanê kovare ra zî şima haydar bikê. Bêguman nuştoxanê kovare ra tayêne zaf tayêne tikê nuşto, mavajê şîyês nuştoxan 20 yan zî hîna zaf hûmaran de, 20 nuştoxan des ra heta 20 hûmaran de, 31 nuştoxan panc ra heta des hûmaran de nuşto. Nê 75 hûmaran de 497 şîîrî, 134 hîkayeyî, 107 roportajî, 108 sanikî, 119 deyîrî, 83 meqaleyê edebî û kulturî, 33 netîceyê kombîyayîşanê Grûba Xebate ya Vateyî, 39 dayîşşinasnayîş û rexneyê kitaban, 221 fiqra û meseleyî, 40 meqaleyê ziwan, gramer û rastnuştişî ûêb weşanîyayê.
Wendoxê delalî,
Grûba Xebate ya Vateyî seba Kombîyayîşê Hîris û Şeşinî, mabênê tarîxanê 08.04.2023-11.04.2023yî de, Dîyarbekir de kom bî. Na hûmare de verê şima netîceyanê nê kombîyayîşî wanenê. M. Malmîsanijî çend çekuyanê ferhenganê Hacî Ozkalî ser o rexneyêk nuşto. Nê rexneyî ra fehm beno ke xebatanê ziwanî de merdim ganî tikêna hesas bo. Û ma bawer kenê ke rexneyê wina musbet û îlmî seba xebata ziwanî lazim ê. Ma na hûmare de beşê VIII. yê xebata etîmolojî ya M. Malmîsanijî zî weşanenê. Menekşe Akaline, nêweşîyanê ruhîyan ser o nuştişê xo domnena. Na rey paranoya ser o nuşto. Şîîrê na hûmare J. Îhsan Espar, Canê Dilo û Mem Keleşî nuştê. Îdris Yazarî zî ma rê yew nesro edebî nuşto. Hîkayeyê na hûmare yê Resul Yildirim û Îsmet Borî yê. Yew estaneka Mistefa Gomayijî û qirkerdişê Dêrsimî ser o yew mektube zî na hûmare de ca gênê.
Heta hûmara bîne bimanê weşîye de!
