Kitabê deheqê Malmîsanijî ''Malmîsanijî Va û Nuşt'' hetê Weşanxaneyê Vateyî ra ame weşanayene. Kitab de pêro nuşteyê M. Malmîsanijî yê bi kirdkî ca gênê.
Kitab hetê Alî Aydin Çîçek û Şadê Agon ra ameyo amedekerdene.
Kitabê Alî Aydin Çîçek û Şade Agone "Malmîsanijî Vat û Nuşt" ame weşanayene. Nuşte û roportajê Malmîsanijî yê ke cayayanê cîya-cîyayan de ameyê weşanayene nê kitabî de amey pêserardene.
Kitabê “Malmîsanijî Va û Nuşt“ nuşteyanê M. Malmîsanijî ra yenê pê û 664 rîpel o. Kitab de nuşte, meqale û roportajê M. Malmîsanijî yê ke kovare û rojnameyanê sey “TÎRÊJ (1980-1981)”, “BERBANG (1989),“HÊVÎ (1983-1987)”, “ARMANC (1990-1994)”, “ROJNAME (1991)”, “ÇIRA & VATE (1996-2000)”, “VATE (1997-2023)”, RÛDAW (2009)” û rojnameyê “NEWEPEL (2011) nusîyayê ca gênê.
Kitab hîrê beşan ra yeno pê.
Nuşteyê daşinasnayîşê kitabî wina yo:
“M. Malmîsanijî bi fedakarîye, bi înadêkê tujî, bi israr û bi cesaretî karêko zaf giran kerdo ra xo piştî û kewto rayîr û no rayîr zî ey bi xo, bi zehmetî, bi keda zafe, bi çîle, bi mucadeleyêkê girdî seba şarê xo akerdo. Ma eşkenê vajê ke M. Malmîsanij raywanê yew ziwanî yo ke bêwayîr û sînorê mergî de yo. O, ci rê wayîr vejîyayo û bîyo roşnîya ci. Mamosta Malmîsanij tena seba kirmancan-kirmanckî ney seba pêroyê kurdan, tarîxê kurdan û lehçeyanê bînan yê kurdkî zî xeylê xizmetê qedirgiranî kerdî û ey hertim bi îmkananê xo piştî daya xizmet û xizmetkaranê tarîx û ziwanê kurdkî. Mamostayî xeylê wendekarî resnayî û vistî rayîrê xebatanê ziwanî. Rayîro ke wextêk tena yew raywanê ci bîyo, ewro bîyo guzergahê bi seyan raywanan. Bêguman heta nika Malmîsanijî û xizmetanê ey ser o xebatê ercîyayeyî ameyî kerdene û ma zî zanenê ke hayîya tayê kesan ked û fedakarîyanê mamostayî ra est a. Hêvîya ma a ya ke rayîrê ziwanê ma de no kitab bibo xerîtaya raywananê heweskar û neweyan.”