Nureddîn Celalî

Serra 1925 semedê kurdan yew milad a, xususan semedê zazayan. Merg, vêşnayîşê dewan, cezayê giranî û sirgûn sey varan varayî kurdan ser. Herkes zaf ra taye no musîbetan ra barê xo girwet. Înan ra yew zî Ezîzê Welan o. Dewa Kosan yê Sêwregi ra yo. Nayê ra tira vanê Ezîzê Kosan zî. Eşîra Desîman ra yo. Ezîzê Welan beşdarê serewedartişê Şêx Seîd beno û bade şikitişê herekete 15 serrî ceza geno. No cezayeko giran o. Çunki teyna cezayê hepis nîyo, roj zî binê erdî ra komir vecenê. Ezîzê Welan wîna 7 serrî vîyarneno. Ezîz Welan dewa Wisikan ya Sêwregi ra Xecê Wisik a zevicîyaye bîyo. O Zonguldak ra hepisî ra remeno û yeno cînîya xo geno û şinê Binê Hetî, Qamişlo. Uca de xo rê yew cuya newe awan kenê.

Seke cor ra ame vatiş Ezîzê Welan xo rê yew cuya newe awan keno. Qeçekî ey benê. Keynayî û lajê ey Mihemed Qamişlo de yeno dinya. Zereyê Qamişlo de beno merdimêko vîcnaye. Sêwregijîya xo zî xo vîr nêkenê. Keye de qecekanê xo de zazakî qisey kenê. Eleqeyê xo û Sêwregi zî nêbirnenê. Xecê Wisik û keynayê ayê her wext şî Sêwregi û amê. Keynayê ey badê mergê  Ezîzê Welan û Xecê Wisikî tekîlîya xo Sêwregi dewam kenê.

Nê zanayîşî mi 24.04.2025 de lacê Ezîzê Welanî, Dr. Mihemed Ezîz Zazayî ra girewtî. O Qamişlo de ameyo dinya, yew rey zî nêşîyo Sêwregi labelê yew zazakîya zelal û weşik ya Sêwregi qisey keno.

                                                                                         Mihemed Ezîz Zaza bi gîtarê xo.

Dr. Mihemed Ezîz Zaza (Mihemed Zaza, Mihemed Ezîz Şakîr), wendegeho verîn, mîyanîn û lîse Qamişlo de waneno. Dr. Mihamed Eziz Şakir Zaza mamostayêko vengdaye yê unîversîte, nuştox, cigêrayox û rexnekerê muzîkî yo. Ey dîplomayê xo Konservatuwara Dewlete ya Pragî (Çekoslovakya) ra serra 1976 de girewt, dima master kerd û dereceye doxtoraya xo wareyê mûzîkolojiyê de Unîversîteya Charles ya Prag de serra 1983 de girewt.

Ey karîyera xo ya akademîkî, Cezayirê de serra 1984 de dest pê kerd, uca de beşa muzîk awan kerd û serekîya îdareyê beşa mûzîkî yê wendegeho berz yê Mamosteyanê Cezayirî kerd. Tîya de, berpirsîyarîya Konseya Zanistî û bernameya masterî heta serra 1991 girwet xo ser. Dima sey mamosteyî Beşa Mûzîkê ya Fakulteya Hûner û Medyayê ya Trablusî (Lîbya) de heta serra 1996 xebitîya.

Dima qerar dano ke welatê xo de konservatuwarêk akero û 1996 de agêyreno Qamişlo. 1997 de nameyê Sentera Hunerên Mûzîk a Qamişloyê de konservatuwarêk akeno. Na Sentere Kurdistan de nûmuneya verîn a. Sentere teyna Qamişlo ra nê, bajaranê bînan ra zî gelêk eleqaya pîl vînena. Yew demo kilme de bena yew merkezê perwerdeyê muzîkî û uca di zaf wendekarî perwerde vînenê, bi seyan wendekar zî Senterê ey ra mezun benê.

Mihemed Ezîz Zaza, beşdarê zaf ciwîyayîş û konferansanê miyanneteweyî yê mûzîk kerdo û gelêk cigêyrayîş, teblîx, meqale û kîtabî ey estê. Kîtabê ey sey kîtabê derse zaf welatan de yenê wendiş. Kîtabê ey: 

·         Zanista Harmoniye (Diatonîk û Kromatîk). Dar El-Hesad - Şam 1993

·         Zanista Kontrapuante. Dar El-Hesad - Şam 1997

·         Gîtar (Teknîkê Cenayîşê Skala û Akordan). Dar El-Hesad - Şam 1995

·         Edîsyonê Erebkî yê Kitabê  Max Battke "Solfêja Vengî û Rîtmîka Lezgîn (PRIMA VISTA)". Dar El-Hesad - Şam 1994

 Kîtabê ey

Serra 2002 de Başur ra taye roşnvîrî şînê Qamişlo. Ê gêyrenê kesanê roşnvîr, hûnermend û wayirê îlimî. Uca de Mihemed Ezîz Zazayî hesîyenê. Şinê Sentera Hunerên Mûzîk a Qamişloyê û ey deweta Hewlêr kene ke Hewlêr de unîversîte de fakulteya muzîkî awan bikero. O zî o tarîx ra dima yeno Hewlêr û fakulte awan keno. Bi keda û embazanê ey 23 serrî ya ke Hewlêr de fakulteya muzîkî esta. Nika teqawit o, Erbîl û Montreal/Kanada de ciwîyeno.

Dr. Mihemed Zaza bi Dyana Abdulkader Zaza zewicîyayeyo û yew lac, hîrê keyayê înan estê. Hemê qecekê înan wendegehê berzî wendê. Keynayê înan Boran (Bewran) Zaza Kanada de yew pîyanocena vengdaye ya.

  Dr. Mihemed Ezîz Zaza bi keyeyê xo.

Boran Zaza

Boran Zaza wendişê xo Qamişlo, Lubnan û Kanada de wend. Pîyanocena Boran Zaza, nika Montreal, Kanada de ciwîyena. Karê pîyanocenî û mamostayî kena. Gelêk esere ayê estê. A hewl dana ke eseranê kurdî adapteye piyano bikere. Newroza 2022 de deyîra Hesen Zîrekî ya ku bi nameyê Newroz a, bi piyano cena û klîbeka newe qabê Newroz kurdanî rê dîyarî kerd. Cêr de di eserê Boran Zaza estê:

·Newroz – Piano Solo.  

·Seyran- Kurdish Piano Melodies.

Pîyanocen Boran Zaza

Ez 24.04.2025 de Ez bi muzîkolog Mamosta Kamiran İbrahîm û Dr. Surwd Sarraj şîya zîyaretê Dr. Mihemed Ezîz Zazayî. Mamosta Kamiran İbrahîm kurdê qamişlo yo û Sentere ra wendekarê Dr. Zazayî yo. Wexto ke o ameyo Hewlêr vendayo Mamosta Kamiran İbrahîm û ardo fakülteye muzîkî de pîya xebitîyê. Dr. Surwd Sarraj zî Hewlêr ra yo û o zî fakülte de bi Dr. Zazayî ya xebitîyo.  Zîyaretê ma hendê di saet ramit û yew subeto gelek weş bi. Zazayî mi rê bi Zazakîya xo ya şîrîn qisey kerd, serviyarteyê xo û keyeyê xo ra qal kerd.

Seke yeno zanayîş, wisaran de firtinayî bene û gelêk zarar dane dordormale labelê dima vilikî rindekî aakenê. 1925 zî seba ma yew firtineyo zaf xidar bi. Wexto ke merdim Dr. Mihemed Ezîz Zaza û qecekanê ey vîneno vilikanê ey firtineyî zî vîneno.

N. Celalî, Dr. M. Ezîz Zaza, Mamosta Kamiran İbrahîm. 24.04.2025 Hewlêr

N.Celalî, Dr. M. Ezîz Zaza, Dr. Surwd Sarraj. 24.04.2025, Hewlêr

 Dr. M. Ezîz Zaza, N.Celalî. 24.04.2025, Hewlêr

        Çimeyî

· Jiyana Dr. Mihemed Zaza. Kurd 1.

2008

·         Boran Zaza, https://www.facebook.com/boran.m.zaza

·         Dr. Mihemed Zaza. https://www.facebook.com/d.mhmd.zyz.zaza

·         Hevpeyvîna Taybet bi Hunermend Boran Zaza re.

Loading...