Fuat Yaman
Çi wext demserrî bêro payîz, aqilê mi şono pelanê daran ser. Pelê daran çimanê mi ver de bi renganê xo yê çeşît-çeşitan mîyanê cuye de dans kenê. Payîz de hewa beno serdin û hewrî hêdî-hêdî rengê xo yê sipî bedilnenê, na rey benê sîyayin û gewrin..
Vayo honik tikêna xo şidneno û dano rîyê merdimî ro. No wext rewşa payîzî bena xirab û merdim beno miroztirş. Tayê kesî seba nê meseleyan, payizî ra hes kenê. Tayê zî gama ke payîz bêro, zerrîyê înan benê teng. Şima mi bipersê ez vana, tena payîz ney pêro demserran perûnî ra heskerdiş yan zî hesnêkerdiş, mi gore ferqê înan çin o. Heme çî pisîkolojîk o.
Mîsal ma tikêna nêzdîyî ra biewnê, şima gore çoparekerdoxî payîzî ra hes kenê? Beno ke înan mîyanî ra tayê kesî ke payîzî ra hes bikerê bivejîyê, la zafê înan payîzî ra hes nêkenê. Çunke her roje pelî daran sey dilopeyê varan ginenê erdî ro. O wext payîz beno dişmenê çoparekerdoxan. Herçiqas paça (pencera) ra ewnîyayîşê bi pel daran zerd, aşil ûsn. weş bo zî yanî asayîşê înan rind bo zî la çimanê çoparekêrdoxanî ra o tewir de nîno asayîş. Beno ke her pel gama ke darî ra bîyero bikewo (bigino ro) erd, ganê çoparêkerdoxan vejîno. Ma na babete şinî eşkenê heme çî ser o bifikirîye. Naye ra pey qalkerdişê şima de qala romantîk bivîyaro, çoparêkerdoxan bîyarê xo vîrî. Nika reyna bifikirîyê, payîz romantîk o, yan ney?