Platforma Ziwanê Kurdkî veng dana heme kurdan ke wayîrê ziwanê xo bivejîyê. Ziwanê xo bipawê. Çunke Ziwanê Kurdkî nasnameyê ma yo, estbîyayîşê ma yo, taca sereyê ma yo!
Beyanatê Platforma Ziwanê Kurdkî yo ke bi minasebetê 21ê Sibate Roja Ziwanê Dayîke ya Dinya ameyo hadrekerdiş cêr de yo:
"Seba ke ma sey Miletêk bieşkê bi serberzî vera asîmîlasyonî vejîyê, ganî verê ma wayîrê ziwanê xo bivejîyê. Ziwanê xo vera asîmîlasyonî bikê mertalêko ganî. Bikê helwestêka sîyasî. Seke yeno zanayene ziwan estbîyayîşê ma yo, nasnameya ma yo, rengê ma yo, hîsê ma yê, fikrê ma yê, tarîxê ma yo, hunerê ma yo, vîrê ma yo, kulturê ma yo, ya, ziwanê kurdkî estbîyayîş û dewlemendîya kurdan bi xo yo!
Weş aseno ke eke ziwan ma dest ra şêro, do siba netewa ma zî ma dest ra şêro. Ma do a game sey miletêk mîyanê miletan de vîndî bê. Ma do bi xo, xo bikişê, xo mîyan ra wedarê û estbîyayîşê xo zî bi destanê xo çin bikê. Eke ma nêwazenê bibê kiştoxê miletêkê wayîrê tarîx û ziwanî yê Rojhelatê Mîyanênî, ganî ma her çîyî ra ver wayîrê ziwanê xo bivejîyê. Meseleyê Ziwanê Kurdkî de ganî ma her game xo bipawê. Sey roşnîya çimanê xo ganî ma ziwanê kurdkî bipawê, vernîya ziwanê xo akerê û game bi game astengîyan mîyan ra wedarê. Bi serberzî zî bi ziwanê xo biwanê, qisey bikê, sîyaset bikê, henek bikê, huner biafirnê, deyîran bikê û biqîrê.
21ê Sibate Roja Ziwanê Dayîke de, ma dewlete ra wazenê ke Ziwanê Kurdkî bibo ziwanê perwerdeyî, bibo ziwanê fermî. Wa Sazgeha Ziwanê Kurdkî bêro ronayene. Wa partîyê sîyasî parlamento de gamêk bierzê, qanûnê ke seba heqê Ziwanê Kurdkî yê, bêrê rojeva parlementoyî. Wa heme hetê sîyasî amancê xo dîyar bikê. Wa bi hemparîyêka hîraye ya sîyasî Ziwanê Kurdkî bibo wayîrê statuyêkê qanûnî.
La verê ke ma biresê amancê xo yê serekeyî ganî ma bi hişmendîya ziwanê xo hereket bikê. Erj û zafîya qiseykerdişî, nuştiş û wendişê ziwanê kurdkî mîyanê şarê xo de berz bikê. Mîyanê şarê xo de hişmendîya ziwanê kurdkî her game aver berê. Her warî de dewaya ziwanê xo bîyarê vernî, ziwanê xo bikê çiman ver. Wa Ziwanê Kurdkî bibo mohr, bibo cewher, bibo ruh û amênê komelê kurdan! Ma heme kurdî ganî yewbînan reyde bibê wayîrê stratejîyêkê ziwanî, stratejîyêka hempare û aktîvîteyê ziwanî zî goreyê na hemparîye bêrê ramitene. PZK her game vana; ma kurd ê, ziwanê ma kurdkî yo û welatê ma zî Kurdîstan o!"
PLATFORMA ZIWANÊ KURDKÎ