Enwer Yılmaz
Tay semedê germê Dîyarbekirî vanê "Germê El Nîno" tay vanê "Germê El Hawar" El nîno manaya xo çi ya nêzana la El Hawar tem zî germê Dîyarbekirî îfade keno. Dîyarbekir her het ra şaristanêko weş o labelê germê ey ver merdim mabênê aşmanê Temûze-Tebaxe cara pêşeno.
Eki merdim nê rojan de şêro cayêk baş o. La ti şîyî zî encax 10-15 rojî. Ti mecburî ke peyser ageyrî cayê xo. Ez mîyanê nê aşmanê german de zaf bena teng. Ti xo bidî verê klîma ti benê nêweş ti nêdî ver germî ver pêşenê… Çîyo ke nê aşman de merdimî keno honik, keyfê merdimî ano, bineyke vayêko serdin û awêka serdine. Nê aşman de cara rojêka ma sey fim a.
"Ez rew ra warişta semedê şîyayîşê gureyî. Semedo ke ma semedê Zazakî Newsî buroyêk peyda nêkerd ez şina buroyêka hevalanê xo û uca de karê xo kena. Homa înan ra razî bo cayê înan honik o. Ma çaya xo, awa xo şimenê, nêmeroj nanê xo wenê. E bi xo zî Zaza yê coka ê zî hetkarî danê Zazakî Newsî û qayîlê wa Zazakî News karê xo rê dewam biko.
Ez ke şina buro sere de arayîya xo kena. Waykêka ma esta pakîya buro, viraştişê werdî û girênayîşê çaye dir eleqedar bena. Homa aye ra razî bo senî virazena ez nêzana ge-ge zî ma rê qehweyo serdin virazena.
Ewro ez şîya ke wayke va" Nanê ma nêmendo." Mi va "Çîke nêbeno ez şina ma rê hebêk gêna." Ez şîya ke nan bigîrî. Semedê mi zî baş bi, mi waştêne tay bo zî wa feydeyê mi bibo. Mi pawitoxê bîna ra pers kerd ke tîya de firine esta yan ney. Pawitoxî va, firine zaf durî ya encax ti eşkenê Marketî ra nan bigîrî. " Ez şîya verê Marketî la padaye bi. Yewêk teber de bi va, saetêk badê cû market abeno. Ez persaya nê zerran de qet nêbo Beqalêk esto ke ma xo rê nan bigîre pê arayîya xo bike. Hewa zî germ bi xora. Serê sibayî bi hema vaje 30-35 derece bi. Ez şîya verê yewna marketî o zî qefilnaye bi. Welhasil mi Beqalêk dî. Labelê padaye bi. Verê dikanî de keynekêk ronişte bî. Va, wayîrê ey şîyo firine nika yeno. Keyfê mi pê ame. Mi xo bi xo va, mêrik nika nano germin ano. Cara mi va qey boya ê nanê geriminî mi zincî ra ha şina war.
Mêrik pê texsîya xo ame. Ez ewnîya destê ey de poşêtêko qij. Mi nan pers kerd la va,” Ma de nan çin o. Ez şîya firine ra mi xo rê çorekî girewtî”. Ez peyarayîr ser de binê tîje de menda. Ewnîyena derdorê xo ra Beqalêko bîn çin o. Abîyayîşê firine rê zî hema nêm saete esto. Eke ez teber de hendê vinderî ez helîyena cara!
Neyse mi da piro ez ver bi bîna şîya. Ez veyşana zî. Tena mi o nano germino ke beqalî nêardbi xiyal kerdbi. La xiyalêko weş bi. Dêmekî ewro şansê mi çin o. Verê bîna de kutikêko gird estbi. Ez bineyke tersaya. Ewnîyaya tira o zî ewnîya mi ra. Ez ewnîya mi ra nêterseno mi rayîrê xo bedilna ez kişta petrolî ra agêraya. Petrol de yewêk erebaya xo şutêne. Awe bîye mi ro. Mi va belkî ozrê xo biwazo la sey herî bi. Şutişê ereba rê dewam kerd.
Ez şiya zereyê bîna kewta asansore. Mi gişta xo pana qata çarine ser. Asansore qata diyîne vindert. Ez zaf tersaya. Mi va, no germ de ez tîya de mirena! Axirî 5 deqa badê asansore xebitîya û vejîya qata çarine.
Mi zîl cena. Wayka ma ber akerd. Mi qet behsê nanî nêkerd. Rîyê yew nanî ra çi ame mi sere çi nêame. Ez fikrîyaya ke ez gere cewabêk bidî ci ke ez qey destveng ameya. Mi va hal mesela wîna ya, ma pê huyayî. Abla va, şikir ti sax silamet ameyî peyser.
Mi xo bi xo va, eke a roje çewt şêro, xirab dest pêbiko heta peynî-şewe wîna şina û ez a roje heta şan miqatê xo bîya"